31 Mart - Azərbaycanlıların Soyqırımı Günü xaricdə qeyd olunmuşdur

Rumıniya

Martın 30-da Azərbaycan Respublikasının Rumıniyadakı səfirliyində, Heydər Əliyev Fondu Rumıniya nümayəndəliyinin, Rumıniya-Azərbaycan Dostluq Cəmiyyətinin, Azərbaycan-Rumıniya Mədəniyyət və Gənclər Assosiasiyasının və ARDNŞ-nin Rumıniyadakı nümayəndəliyinin rəhbər və idarə heyətinin, ölkədə yaşayan və təhsil alan azərbaycanlıların, KİV nümayəndələrinin iştirakı ilə 31 Mart - Azərbaycanlıların Soyqırımı Gününə həsr olunmuş geniş tədbir keçirilmişdir.

Tədbirdə XIX əsrin əvvəllərində Azərbaycanın Rusiya və İran arasında bölüşdürülməsi, həmin dövrdən başlayaraq rusların siyasi dəstəyi və himayəsi ilə ermənilərin Şimali Azərbaycan torpaqlarına köçürülməsi, erməni ekspansionizminin geniş vüsət alması və türk-müsəlman əhalisinə qarşı törədilən təxribat, soyqırımı aktları tarixi faktlarla mərasim iştirakçılarının diqqətinə çatdırılmışdır.

Həmçinin mərasimdə Birinci Dünya müharibəsinin sonlarında Rusiyada yaranmış vəziyyətdən istifadə edən ermənilərin 1917-ci ildə baş vermiş fevral və oktyabr inqilablarından sonra istəklərinə bolşevizm bayrağı altında nail olmağa cəhd etdikləri bildirilmişdir. Bakı Sovetinin əks-inqilabi ünsürlərlə mübarizə şüarı altında 1918-ci ilin əvvəllərindən bütün Bakı quberniyasında yaşayan azərbaycanlıların çıxarılması məqsədini güdən cinayətkar planın reallaşdırılmasına başladığı diqqətə çatdırılmışdır.

Daha sonra, 1918-ci ilin mart-aprel aylarında ermənilər tərəfindən törədilən cinayətlərin Azərbaycan xalqının yaddaşında silinməz iz qoyduğu, təkcə milli mənsubiyyətinə görə minlərlə dinc azərbaycanlının məhv edildiyi, ermənilər tərəfindən evlərin yandırıldığı, insanların diri-diri oda atıldığı, milli memarlıq abidələrinin, məktəblərin, xəstəxanaların, məscidlərin və digər tikililərin dağıdıldığı, azərbaycanlıların soyqırımının Bakı, Şamaxı, Quba, Qarabağ, Zəngəzur, Naxçıvan, Lənkəran və Azərbaycanın digər ərazilərində xüsusi qəddarlıqla həyata keçirildiyi vurğulanmışdır.

Tədbirdə qeyd olunmuşdur ki, 1992-ci il fevralın 26-da Xocalıda günahsız dinc Azərbaycan əhalisinə qarşı törədilmiş soyqırımı hadisəsi müasir dövrdə erməni millətçi ideologiyasının qanlı təzahürlərindəndir.

31 Mart - Azərbaycanlıların Soyqırımı Günü ilə bağlı səfirlik tərəfindən hazırlanmış geniş press-reliz Rumıniyanın dövlət orqanlarına, qeyri-hökumət təşkilatlarına, ölkədə fəaliyyət göstərən diplomatik nümayəndəliklərə göndərilmişdir.

Çin

Çin Xalq Respublikasında 31 Mart - Azərbaycanlıların Soyqırımı Gününə həsr olunmuş tədbir keçirilmişdir.

Azərbaycanın Çindəki səfirliyində təşkil olunan tədbirdə əvvəlcə soyqırımı qurbanlarının xatirəsi bir dəqiqəlik sükutla yad edilmişdir.

Səfir Lətif Qəndilov 1918-1920-ci illərdə bədnam ermənilərin Azərbaycanın şəhər və rayonlarında, o cümlədən Bakıda, Şamaxıda, Qubada törətdikləri qanlı hadisələrdən danışmışdır. Bildirmişdir ki, qəsbkar düşmən xalqımıza qarşı dəhşətli soyqırımı həyata keçirmiş, on minlərlə azərbaycanlını amansızcasına qətlə yetirmişdir. Düşmənin məqsədi qanlı qırğınlar törətməklə Azərbaycanı, türk-müsəlman əhalisini məhv etmək olmuşdur.

Səfir ümummilli liderimiz, görkəmli dövlət xadimi Heydər Əliyevin 1998-ci il martın 26-da imzaladığı "Azərbaycanlıların soyqırımı haqqında" fərmanın əhəmiyyətini vurğulamışdır.

Bildirilmişdir ki, ermənilər "böyük Ermənistan" yaratmaq xülyası ilə bu gün də qəsbkarlıq siyasəti apararaq torpaqlarımızın 20 faizini işğal altında saxlayırlar. İşğal olunan şəhər və rayonlarımızın tezliklə düşmən tapdağından azad ediləcəyinə əminliyini bildirən səfir gəncləri vətənpərvərliyə çağırmışdır.

Digər çıxış edənlər də ermənilərin torpaqlarımızda törətdikləri qanlı faciələrdən danışmış, bu barədə dünya xalqlarına daha geniş məlumatlar çatdırılmasının vacibliyini vurğulamışlar.

Sonda azərbaycanlıların soyqırımına həsr olunan sənədli film nümayiş etdirilmişdir.

Şahin CƏFƏROV

Azərbaycan.- 2012.- 1 aprel.- S. 4.