Azərbaycan və İsveç arasında ailə və uşaq problemlərinin həlli sahəsində əməkdaşlıq yüksək qiymətləndirilmişdir

AzərTAc xəbər verir ki, Azərbaycan Respublikasının Ailə, Qadın və Uşaq Problemləri üzrə Dövlət Komitəsinin (AQUPDK) sədri Hicran Hüseynova aprelin 3-də İsveç Riksdaqının (parlamentinin) qadın deputatları ilə görüşmüşdür.

Ölkəmizdə həyata keçirilən dövlət qadın siyasəti haqqında geniş məlumat verən H.Hüseynova qeyd etmişdir ki, Prezident İlham Əliyev gender balansının təmin edilməsi məsələlərinə, ailə və uşaq problemlərinin həllinə prioritet əhəmiyyət verir. O, həmçinin Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevanın qadınların sosial rolunun daha da artırılmasına, onların müxtəlif sahələrdə bərabərhüquqlu fəaliyyət imkanlarının genişləndirilməsinə, uşaq hüquqlarının tam həcmdə həyata keçirilməsinə və ailə dəyərlərinin möhkəmləndirilməsinə yönəlmiş fəaliyyətini xüsusi vurğulamışdır.

AQUPDK sədri müvafiq istiqamətlər üzrə xarici ölkələr, o cümlədən İsveç ilə əməkdaşlığın inkişafının xüsusi əhəmiyyətini qeyd etmişdir.

Qonaqlar Azərbaycanda reallaşdırılan dövlət qadın siyasətini, habelə ailə və uşaq problemlərinin həlli sahəsində toplanmış təcrübəni yüksək qiymətləndirmişlər. Söhbət zamanı onları maraqlandıran suallar ətraflı cavablandırılmışdır. AQUPDK-nın Azərbaycanda müvafiq istiqamətlər üzrə fəaliyyətin təşkilində fəal rolu xüsusi vurğulanaraq, gələcəkdə əlaqələrin daha da genişləndirilməsinin zəruriliyi qeyd edilmişdir.

Azərbaycan.- 2012.- 4 aprel.- S. 10.