“Araz” radiosu bir yaşını qeyd etmişdir

Aprelin 4-də "Gülüstan" sarayında "Araz" radiosunun bir yaşının tamam olması münasibətilə mərasim keçirilmişdir.

AzərTAc xəbər verir ki, tədbirdə hökumət rəsmiləri, Milli Məclisin deputatları, sənət adamları, ölkənin digər radiolarının tanınmış aparıcıları və KİV təmsilçiləri iştirak etmişlər.

Yaradıcı kollektivi təbrik edən Milli Televiziya və Radio Şurasının sədri Nuşirəvan Məhərrəmli hər gün səhər saat 10.00-dan axşam saat 22.00-dək yayımlanan radionun fəaliyyəti, qazandığı uğurlar barədə məlumat vermişdir. N.Məhərrəmli radioların dilimizin inkişafında, milli adət-ənənələrimizin və mənəvi dəyərlərimizin qorunmasında böyük rol oynadıqlarını qeyd etmiş, "Araz"ın da bu vəzifənin öhdəsindən layiqincə gəldiyini vurğulamışdır.

İctimai Televiziya və Radio Yayımları Şirkəti Yayım Şurasının sədri, professor Cahangir Məmmədli bir yaşını qeyd edən "Araz"ın kollektivini təbrik etmiş, radionun bir-birindən maraqlı verilişlər ilə dinləyicilərin rəğbətini qazandığını bildirmişdir. C.Məmmədli qısa vaxt ərzində 103.3 FM-in yeni rubrikalar, maraqlı verilişlərlə böyük dinləyici auditoriyası qazandığını demişdir .

Mərasimdə çıxış edənlər 90 faizi informasiya yüklü olan radionun birillik fəaliyyəti ərzində dünyada və Azərbaycanda baş verən ən son siyasi, iqtisadi, sosial, idman, mədəniyyət xəbərləri ilə dinləyiciləri məlumatlandırdığını bildirmişlər. "Araz" dalğasında maarifçilik, elmi-kütləvi və əyləncəli layihələrin də təqdim edildiyi, "Azad xəbər", "Yolda ikən", "Sözün düzü", "Yurdum" və digər verilişlərin səsləndirildiyi diqqətə çatdırılmışdır.

Yarandığı ilk vaxtlarda yalnız Bakı və Abşeron yarımadasında yayımlanan radionun yayımı artıq bütün Azərbaycanı əhatə edir.

Azərbaycan.- 2012.- 5 aprel.- S. 3.