Almaniya Beynəlxalq Hüquq Əməkdaşlığı Fondunun mütəxəssisləri Penitensiar Xidmətin əməkdaşları üçün seminar keçirmişlər

Almaniyanın Beynəlxalq Hüquq Əməkdaşlığı Fondunun (İRZ) mütəxəssisləri Azərbaycanın Penitensiar Xidmətinin əməkdaşları üçün seminar-treninq keçirmişlər. Penitensiar Xidmətin ictimaiyyətlə əlaqələr şöbəsindən AzərTAc-a bildirmişlər ki, İRZ 2010-cu ildən etibarən Azərbaycanda aparılan məhkəmə və hüquq islahatlarına dəstək məqsədilə müxtəlif layihələr həyata keçirir.

Əvvəlcə cəzaçəkmə müəssisələrinin rəisləri üçün "Cəzaçəkmə müəssisələrində məhkumların idarə edilməsinin təşkili" və "Həbsxana tipli müəssisələrdə cəzanın icrasının təşkili" mövzularında seminarlar təşkil olunmuşdur. Tədbirdə ekspert qismində Almaniyanın Bruksal şəhərindəki həbsxananın rəisi Tomas Müller, bu ölkənin Nordrayn-Vestfallen əyalətinin Penitensiar Xidmətinin istefada olan vitse-prezidenti Linhard Dreger və İRZ-in Azərbaycan üzrə əlaqələndiricisi Rəşad Hüseynli iştirak etmişlər.

Aprelin 4-də isə cəzaçəkmə müəssisələri rəislərinin tərbiyə işləri üzrə müavinləri üçün "Məhkumların vaxtından əvvəl azad olunmasına hazırlıq işlərinin aparılması" mövzusunda treninq keçirilmişdir.

Azərbaycan.- 2012.- 6 aprel.- S. 4.