İlk addımlar

Gəncənin Kəpəz televiziyasında "Difai" və "Difai hamisi" adlı sənədli-bədii və tarixi araşdırma filmi istehsal olunub. "Difai" (müdafiə) tanınmış ictimai xadim Əhməd bəy Ağaoğlu tərəfindən yaradılan eyniadlı partiyanın fəaliyyətindən bəhs edir. Bəllidir ki, "Difai" ötən əsrin əvvəllərində Azərbaycanın müxtəlif qəzalarında qırğınlar törədən erməni "Daşnaksütyun" terror firqəsindən və onları silahlandıran qüvvələrdən xalqı müdafiə məqsədilə yaradılmışdı.

Bu qeyrət-qisas partiyasının fəaliyyəti dövründə xalqın milli şüurunun oyadılması, daxili və xarici düşmənlərdən qisas alınması sahəsində xeyli iş görülmüşdür. "Difai hamisi" adlı ikinci filmdə isə həmin partiyanın Gəncə şöbəsinin rəhbərlərindən biri, Gəncə məscidinin axundu Şeyxülislam Məhəmməd Pişnamazzadənin həyat və yaradıcılıq yolundan bəhs edilir.

Hər iki filmin ərsəyə gəlməsində əsas məqsəd tarixi şəxsiyyətlərimizin, elm adamlarının və nüfuz sahiblərinin keçdikləri gərgin və qeyrətli həyat yolunu obrazlı şəkildə, konkret faktlarla yaxından tanıtmaqdan, onların ideyalarını təbliğ etməkdən ibarətdir.

Filmlərdə Gəncə Dövlət Dram Teatrının aktyorları və həvəskar aktyorlar çəkiliblər. Hər iki filmin müəllifi və aparıcısı Ayaz Əbülfəzoğlu, rejissoru Çinarə Əliyevadır.

Azərbaycan.- 2012.- 6 aprel.- S. 6.