Rusiya ilə Azərbaycan arasında əməkdaşlıq humanitar sahədə də uğurla inkişaf edir

Rusiya ilə Azərbaycan arasında əməkdaşlıq humanitar sahədə də uğurla inkişaf edir. Ötən il Azərbaycan və Rusiya prezidentlərinin təşəbbüsü ilə keçirilmiş Beynəlxalq Humanitar Forum ənənəyə çevriləcəkdir. Biz hər il belə forumlar keçirəcəyik. Çünki bu cür tədbirlər əlaqələrimizi və əməkdaşlığımızı daha da dərinləşdirməyə imkan verir.

AzərTAc xəbər verir ki, bu sözləri Bakıda rəsmi səfərdə olan Rusiya Federasiyası Federal Məclisi Federasiya Şurasının sədri Valentina Matviyenko demişdir.

Federasiya Şurasının sədri qeyd etmişdir ki, təhsil sahəsində əməkdaşlığımız sürətlə inkişaf edir. Hər iki ölkə qarşısında duran əsas məsələlərdən biri də iqtisadiyyatı innovativ inkişafa, elmi texnologiyalara keçirməkdir. Bu işdə universitetlər mühüm rol oynayırlar. Moskva Dövlət Universitetinin Bakı filialı da çox böyük nüfuza malikdir. Rusiyanın ali təhsil müəssisələrində xeyli azərbaycanlı tələbə təhsil alır. Bu, ölkələrimiz arasında canlı, real körpüdür. Çünki bu gün hər iki ölkənin rəhbərliyinin gördüyü işləri gənclərimiz davam etdirəcəklər. Buna görə də belə əlaqələri inkişaf etdirmək çox vacibdir.

Azərbaycan.- 2012.- 10 aprel.- S. 3.