“İRS” beynəlxalq jurnalının növbəti nömrəsi Bakıda musiqi mövsümünün başlanmasından söz açır

Moskvada nəşr olunan "İrs-Naslediye" beynəlxalq jurnalının növbəti nömrəsi Azərbaycan üçün çox mühüm hadisə - "Eurovision-2012" beynəlxalq musiqi müsabiqəsi ərəfəsində işıq üzü görmüşdür.

Jurnal ötən 10 ildə öz səhifələrində Azərbaycan musiqisinə həsr olunmuş onlarca məqalə dərc etmişdir. Budəfəki nömrənin - "Azərbaycan Odlar və festivallar diyarıdır" sərlövhəli məqaləsində ölkəmizdə keçirilən ənənəvi musiqi festivalları və onların yaranması tarixi barədə maraqlı material təqdim olunmuşdur. Məqalədə deyilir ki, Azərbaycan beynəlxalq musiqi təqviminin əhəmiyyətli tədbirlərinin keçirilməsi üçün təsadüfən seçilməmişdir. Azərbaycanın musiqi mədəniyyətinin tarixi və zəngin ənənələri, beynəlxalq miqyaslı musiqi festivallarının ölkədə keçirilməsi belə düşünməyə əsas verir ki, Azərbaycan nəinki belə miqyaslı festivallarda uğurla iştirak etməyə, həm də onu daha böyük müvəffəqiyyətlə öz evində təşkil etməyə qabildir. Məqalədə deyilir: "Bu festival təkcə parlaq musiqi bayramı kimi deyil, həm də yüksək təşkilatçılıq səviyyəsi sayəsində uzun müddət yaddaşlardan silinməyəcəkdir. Azərbaycanda qarşıdan gələn müsabiqəyə ilk növbədə son illər sosial-iqtisadi inkişafda sanballı nəticələrə nail olmuş bir ölkə barədə beynəlxalq ictimaiyyətdə son dərəcə gözəl imic formalaşdırmaq imkanları nöqteyi-nəzərindən ümumdövlət əhəmiyyətli tədbir kimi baxılır".

Jurnalda, həmçinin Azərbaycanın tarixi, mədəniyyəti və incəsənəti haqqında "Azərbaycanlıların 1918-ci il soyqırımı bolşeviklərin xatirələrində", "Yerevangeyt"dən ötən 15 il: qalmaqalın geosiyasi nəticələri", "Azərbaycan Xalq Cümhuriyyəti vətəndaşının xarici pasportu", habelə "Bethoven haqqında etüd", "Azərbaycan Dövlət Rus Dram Teatrı: dünən və bu gün" sərlövhəli məqalələr və digər yazılar yer almışdır.

Asya HACIZADƏ

Azərbaycan.- 2012.- 25 aprel.- S. 3.