Əli ƏHMƏDOV: Digər ölkələrdə də Xocalı soyqırımı ilə bağlı qətnamələrin qəbul olunacağına inanırıq

Artıq Xocalı soyqırımı ilə əlaqədar dünyanın bir çox ölkələrində müvafiq sənədlər qəbul olunur. Kolumbiya Senatının Xocalı soyqırımını tanıması isə bu prosesin başlanğıcıdır.

AzərTAc xəbər verir ki, bu sözləri aprelin 24-də hakim Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov demişdir.

"Kolumbiya Senatının Xocalı soyqırımını tanımasını müsbət qiymətləndiririk" deyən Əli Əhmədov qeyd etmişdir ki, istənilən haqsızlığa qarşı bəşəriyyət, ayrı-ayrı xalqlar öz haqq səslərini ucaltmalıdırlar.

Bunun ardınca digər ölkələrdə də bu cür qətnamələrin qəbul olunacağına inandığını deyən hakim partiyanın sədr müavini vurğulamışdır ki, Azərbaycan cəmiyyəti və bütövlükdə xaricdə fəaliyyət göstərən diaspor təşkilatlarımız da bu istiqamətdə səylərini artırmalıdırlar. Əgər yalan və böhtan üzərində qurulan hər hansı ideologiya yüz il ərzində yaşayıbsa və onu yaşada biliblərsə, o zaman həqiqətən yaxın bir zamanda baş vermiş faciənin dünya ictimaiyyəti tərəfindən əsl faciə kimi qəbul olunmaması yolverilməz hal olardı. Artıq bəşəriyyət bu reallığı dərk edir və bunun əyani sübutu Kolumbiya Senatının qəbul etdiyi qərardır.

Azərbaycan.- 2012.- 25 aprel.- S. 4.