Prezident İlham Əliyev xalqın alternativsiz etimad ünvanıdır

Azərbaycan isə regionun lider dövləti statusunu layiqincə daşıyır

Sürətli inkişaf dövrünü yaşayan Azərbaycanın Cənubi Qafqazın lider dövlətinə çevrilməsi və bu statusu uğurla daşıması bütün dünyanın, xüsusən bu regionu özünün iqtisadi mənafeyi baxımından vacib tərəfdaşı kimi görən Avropanın qəbul etdiyi inkarolunmaz reallıqdır. Elə buna görə təsadüfi deyil ki, Cənubi Qafqazı əhatə edən hər hansı beynəlxalq layihənin Azərbaycanın maraqlarını nəzərə almadan həyata keçirilməsi mümkün deyil. Azərbaycanla hesablaşır, məsləhətləşir və hər bir əməkdaşlıq məsələsində əsas tərəfdaş kimi qəbul edirlər.

Bütün bu amillər Azərbaycan Respublikasının dünyada artan nüfuzunun və imicinin birbaşa göstəricisidir. Əlbəttə, beynəlxalq miqyasda qazandığımız yüksək etimadın kökündə ilk növbədə ölkəmizin etibarlı siyasi və iqtisadi tərəfdaş olması, dünyanı narahat edən hər bir məsələdə qətiyyətli və prinsipial mövqe tutması, sülhə və əmin-amanlığa layiqli töhfələr verməsidir. Azərbaycan ordusunun bölmələri ayrı-ayrı ölkələrdə sülhün və əmin-amanlığın təmin olunmasında iştirak edir, beynəlxalq terrorçuluqla mübarizədə öz sözlərini deyirlər. Eyni zamanda, Azərbaycan bir sıra Avropa ölkələrinin enerji təhlükəsizliyinin təmin olunmasında əsas tərəfdaşlardan biridir. Ölkəmiz beynəlxalq miqyaslı bütün məsələlərdə üzərinə düşən öhdəlikləri layiqincə yerinə yetirməklə etibarlı tərəfdaş olduğunu hər zaman nümayiş etdirmişdir. Bunun da məntiqi nəticəsi olaraq Azərbaycanın beynəlxalq nüfuzu sürətlə yüksəlməkdədir.

Azərbaycanın dünyadakı yüksək siyasi nüfuzunun ən bariz nümunəsi kimi ölkəmizin ötən ilin oktyabrında BMT Təhlükəsizlik Şurasına (TŞ) üzv seçilməsini misal göstərmək olar. Nəzərə alsaq ki Təhlükəsizlik Şurasının üzvü olmaq təyinatla və növbəlilik prinsipi əsasında deyil, məhz səsvermə yolu ilə baş verir, bu zaman Azərbaycana beynəlxalq ictimaiyyətin etimadının nə dərəcədə olduğunu görmək olar. BMT üzvü olan digər ölkələr bu qədər səs ala bilmədikləri halda, Azərbaycan səsvermənin ilkin mərhələlərində 100-dən çox, sonda isə 155 ölkədən səs toplamaqla faktiki olaraq dünyanın bütün bölgələrinin etimadını qazandı, iki il müddətinə BMT Təhlükəsizlik Şurasının üzvü seçildi. TŞ-na keçirilən səsvermədə Azərbaycana səs verənlər sadəcə Cənubi Qafqazın sıradan bir ölkəsinin deyil, beynəlxalq miqyasda özünün müsbət imici ilə tanınan, bütün dünyada hər bir sahə üzrə ciddi nüfuz qazanan bir respublikanın namizədliyini dəstəkləmiş oldular. Bu səsvermə nəticəsində BMT Təhlükəsizlik Şurasına seçilmək Azərbaycanın dünyadakı nüfuzunun göstəricisi, beynəlxalq aləmdə ciddi və etibarlı bir ölkə olduğunu nümayiş etdirdi.

Azərbaycanın BMT TŞ-nın üzvü seçilməsi ilk növbədə Prezident İlham Əliyevin uğurlu xarici siyasətinin göstəricisidir. Ölkəmizin bu qələbəsini məhz Prezident İlham Əliyev təmin etmişdir. Çünki məhz beynəlxalq münasibətlər sistemini dəqiqliyi ilə bilmək, kontur mövqelər hazırlamaq, Azərbaycanın xarici siyasətinin doktrinasının tələblərinə müvafiq real, çevik manevrlər etmək və bu planda BMT müstəvisində, xüsusilə də BMT Baş Məclisinin sessiyalarında ölkəmizin maraqlarını müdafiə edən ardıcıl tədbirlər reallaşdırmaq məhz dövlət başçısının iradəsinin, mövqeyinin siyasi dəst-xəttinin nəticələridir. Odur ki, Azərbaycanın bu posta seçilməsi Prezident İlham Əliyevin indiyədək apardığı düşünülmüş və məqsədyönlü siyasətin məntiqi sonluğudur.

Eləcə də bu ilin fevral ayında Meksikanın Los Kabos şəhərində "Böyük iyirmiliyin" (G-20) sammitində Azərbaycanın iştirakı ölkəmizin artan nüfuzunun növbəti nümayişi, beynəlxalq arenadakı uğurlarından biri oldu. Bu sammitə keçmiş SSRİ məkanından yalnız Azərbaycan dəvət olunmuşdu. BMT TŞ-na üzvlükdən sonra bu cür mötəbər toplantıda iştirak etmək Azərbaycanın artan nüfuzunun, beynəlxalq məsələlərdə mühüm rol oynayan ölkəyə çevrilməsinin təsdiqidir.

Bu fakt ondan xəbər verdi ki, dünyada qlobal maliyyə böhranının hələ də davam etdiyi bir şəraitdə sürətlə inkişaf edən Azərbaycanın mövqeyini bilmək "Böyük iyirmiliyin" marağındadır. Bu mənada Azərbaycanın bu sammitdə iştirakı həm də bu, ölkəmizin sürətli inkişafının, artan iqtisadi qüdrətinin göstəricisidir. G-20 çərçivəsində keçirilən tədbirlərə dəvət olunan ölkələr öz inkişafları ilə diqqəti cəlb edirlər. Prezident İlham Əliyevin yeni dövrün tələblərinə uyğun, zamanın nəbzini tutmaqla həyata keçirdiyi düşünülmüş, sürətli və davamlı inkişaf strategiyasının nəticəsi olaraq son 8 ildən artıq müddətdə Azərbaycan iqtisadiyyatı dinamik inkişaf edib. Bu müddətdə Azərbaycan dünya miqyasında analoqu olmayan inkişaf tempi ilə böyük sosial-iqtisadi uğurlar əldə edib. Prezident İlham Əliyev Koreya Respublikasında nəşr olunan nüfuzlu "Diplomacy" jurnalına müsahibəsində ölkəmizin iqtisadi vəziyyəti ilə bağlı suala cavabında bu barədə deyib: "Azərbaycan dünyanın ən sürətli inkişaf edən ölkələrindən biridir. Son vaxtlar həyata keçirilən uğurlu islahatlar nəticəsində Azərbaycan iqtisadi inkişaf templərinə görə dünyada liderdir. Ümumi daxili məhsulun artımı baxımından biz ən yüksək göstəricilərə nail olmuşuq. Son bir neçə ildə ölkə iqtisadiyyatı demək olar ki, 300 faiz artmışdır".

Dövlət başçısı müsahibəsində həyata keçirilən liberal iqtisadi siyasətin ölkədə sahibkarlıq fəaliyyəti üçün münbit şərait yaratdığını, iqtisadiyyatda özəl sektorun payının artıq 80 faizdən çox olduğunu, bu gün Azərbaycan iqtisadiyyatı ümumilikdə Cənubi Qafqaz iqtisadiyyatının 75-80 faizini təşkil etdiyini diqqətə çatdırmışdır. Qeyd edək ki, müsahibənin əvvəlində jurnalın rəhbəri, doktor Thok-kyu Limb oxuculara Azərbaycan Respublikası barədə məlumat verərək bildirmişdir ki, uğurlu iqtisadi islahatlar nəticəsində hazırda dünyanın ən sürətlə inkişaf edən ölkələrindən birinə çevrilən Azərbaycan bu iqtisadi sıçrayışa Prezident İlham Əliyevin rəhbərliyi ilə nail olub.

Bu il Azərbaycan Prezidenti İlham Əliyev dünyanın bütün dövlətlərinin maraqla izlədiyi və vacib əhəmiyyət daşıyan beynəlxalq siyasi və iqtisadi tədbirlərdə iştirak etmişdir. Buna misal olaraq Koreyada keçirilmiş Nüvə Sammitini misal çəkmək olar. Azərbaycanda nüvə sənayesinin, atom stansiyalarının olmamasına baxmayaraq, Prezident İlham Əliyev bu mötəbər toplantıya dəvət edilib və ölkəmizin bizim ədalətli mövqeyi bu qurumun tribunasından səslənib, Ermənistanda 1976-cı ildə fəaliyyətə başlamış və hazırda köhnəlmiş Metsamor atom elektrik stansiyasının bütöv region və yaxınlıqda olan qonşular üçün potensial fəlakət mənbəyi olduğu bəyan edilib.

Bundan başqa, Prezident İlham Əliyevin iştirak etdiyi Davos Dünya İqtisadi Forumu və Münxen Təhlükəsizlik Konfransı da dünyanın siyasi və iqtisadi mənzərəsində öz yeri olan mühüm tədbirlərdir. Biri iqtisadi, digəri isə təhlükəsizlik və siyasi məsələləri əhatə edir. Bu tədbirlərin hər ikisində Azərbaycan fəal təmsil olunub, Prezident İlham Əliyev ölkəmizin baxışlarını, mövqeyini və siyasi xəttini uğurla ifadə edib. Xüsusilə dünya birliyinin diqqəti Ermənistan-Azərbaycan, Dağlıq Qarabağ münaqişəsi ilə bağlı həqiqətlərə, torpaqlarımızın işğal altında qalmasına və bir milyon soydaşımızın əziyyət çəkməsi məsələlərinə cəlb olunub.

Aprel ayının əvvəllərində isə Bakıda Avronest Parlament Assambleyasının ikinci sessiyası keçirildi. Bu sessiyanı yüksək səviyyədə təşkil etməklə Azərbaycan bir daha göstərdi ki, hər bir beynəlxalq təşkilatın tədbirinə ev sahibliyi etməyə qadirdir. Sessiya iştirakçıları da tədbirin təşkili məsələlərindən razılıqlarını ifadə etdilər. Ən əsası bu tədbir imkan verdi ki, Azərbaycan tərəfi Avropa Parlamenti deputatlarına birbaşa müraciət edərək ölkəmizin üzləşdiyi haqsızlıqlarla bağlı mövqeyini bir daha bildirsin.

Bütövlükdə, bu beynəlxalq tədbirlərin hər birində Azərbaycan dünya birliyinin vacib oyunçusu kimi öz sözünü dedi. "Bir sözlə, birinci rübdə beynəlxalq aləmdə də Azərbaycanla bağlı çox maraqlı və ciddi müzakirələr aparılmışdır. Ölkəmiz beynəlxalq aləmin dəyərli üzvü kimi öz sözünü deyir və deyəcəkdir. Bizim xarici siyasətimiz daxili siyasətimizin məntiqi davamıdır. Xarici siyasətimiz əməkdaşlığın dərinləşməsinə hesablanıb. Biz bu istiqamətdə addımlar atırıq. Bizim xarici siyasətimiz açıqdır, aydındır və birmənalıdır. Bölgədə, dünyada rolumuz artır. Bu, həqiqətdir və bu həqiqətlə hesablaşmaq lazımdır" - deyə Prezident İlham Əliyev bildirib.

Belə uğurlu siyasətin həyata keçirilməsinin nəticəsidir ki, Azərbaycan əhalisinin mütləq əksəriyyəti hər zaman Prezident İlham Əliyevi dəstəkləyir. Bu günlərdə "Rəy" Monitorinq Mərkəzinin keçirdiyi ictimai rəy sorğusunun nəticələri də cənab İlham Əliyevin reytinqinin çox yüksək olduğunu təsdiqləyir. Sorğunun nəticələrinə görə, əgər qarşıdan gələn bazar günü ölkədə prezident seçkiləri keçirilsəydi, seçicilərin mütləq əksəriyyəti - 91 faizə yaxını dövlət başçısı İlham Əliyevə səs verərdi. "İlham Əliyev sizin maraqlarınıza cavab verirmi?" sualını respondentlərin 87 faizi "bəli, cavab verir" - deyə cavablandırıb. Həmçinin məlum olub ki, qarşıdan gələn bazar günü prezident seçkiləri keçirilsəydi, respondentlərin əksəriyyəti - 77 faizi birmənalı olaraq səsverməyə qatılardılar.

Bir neçə gün əvvəl Avropa Parlamentinin qəbul etdiyi qətnamədə Azərbaycanın ədalətli mövqeyinin əks olunması, Meksika və Pakistandan sonra Kolumbiya Senatının Xocalı soyqırımını tanınması Azərbaycan hakimiyyətinin apardığı uğurlu xarici siyasətin nəticəsi, beynəlxalq miqyasda artan nüfuzunun göstəricisidir. Gələn ay isə Azərbaycan BMT Təhlükəsizlik Şurasında sədrlik funksiyasını üzərinə götürəcək. Eyni zamanda, may ayında Avropanın mühüm mədəni tədbiri olan "Eurovision" mahnı yarışması keçiriləcək. İstər BMT Təhlükəsizlik Şurasının sədri, istər "Eurovision" mahnı müsabiqəsinin təşkilatçısı kimi Azərbaycan üzərinə düşən vəzifələri layiqincə yerinə yetirəcək və beləliklə, beynəlxalq nüfuzunun yüksəlməsinə xidmət edən növbəti uğurlara imza atacaq.

Rəşad CƏFƏRLİ

Azərbaycan.- 2012.- 27 aprel.- S. 7.