Brayn Kenqa: УQəbələ festivalında dünya şöhrətli musiqiçilərin iştirakı onun yüksək səviyyəsindən xəbər verirФ

"Beynəlxalq musiqi festivalının belə bir gözəl yerdə, dağlar, meşələr arasında, bu cür tanınmış ifaçıların iştirakı ilə keçirilməsi mənim üçün böyük sürpriz oldu. Çoxdandır ki, Azərbaycana gəlmək arzusunda idim. Qəbələdə keçirilmiş üç beynəlxalq musiqi festivalı haqqında eşitmişdim. Bu füsunkar diyara gəlməyi, festivalın iştirakçısı olmağı çox arzulayırdım".

AzərTAc xəbər verir ki, bu sözləri Heydər Əliyev Fondunun təşkilatçılığı ilə keçirilən Qəbələ IV Beynəlxalq Musiqi Festivalının iştirakçısı, London Royal Filarmonik Orkestrinin solisti, məşhur kontrabas ifaçısı Brayn Kenqa jurnalistlərə müsahibəsində demişdir.

Qonaq Qəbələ festivalında iştirakı ilə ölkəmizi yaxından tanımaq üçün gözəl imkan əldə etdiyini, yerli musiqiçilərlə dostluq əlaqələri yaratdığını bildirmişdir: "Ümumiyyətlə, bu gözəl diyarda Şərq mədəniyyəti ilə bağlı olan hər şey məndə maraq doğurur. Növbəti illərdə də böyük məmnuniyyətlə Qəbələ festivalına qatılmaq istərdim".

Brayn Kenqa belə bir gözəl təşəbbüsü irəli sürənlərə, bu festivalın təşkilatçılarına minnətdarlığını bildirmişdir. Qeyd etmişdir ki, Ottavio Palmieri, Marko Kinqari, Covanni Brollo, Dmitri Yablonski, Yuri Başmet, Boris Berezovski, Aleksandr Çaykovski, Andrey Yaroşinski, Nadejda Tokareva, Fyodor Amosov, Sergey Krilov kimi dünya şöhrətli musiqiçilərin Qəbələ festivalında iştirakı onun yüksək səviyyəsindən xəbər verir. "Böyük sənətkarlarla birgə beynəlxalq musiqi festivalında təmsil olunmağımla fəxr edirəm. Auditoriyanın festival çərçivəsində keçirilən konsertlərə böyük marağı da məni heyran edir".

 

 

Azərbaycan.- 2012.- 2 avqust.- S. 8.