Sergey Krilov: “Dünya səviyyəli Qəbələ festivalında bir daha Azərbaycan musiqisinin ecazkarlığının, xalqınızın yüksək qonaqpərvərliyinin şahidi olduq”

"Qəbələ festivalı çox ecazkar məkanda keçirilir. Burada çıxış etməkdən məmnunam. Keçən il də burada Mendelsonun əsərini ifa etmişdim. Bu dəfə dahi rus bəstəkarı Pyotr Çaykovskinin əsərlərini London Royal Filarmonik Orkestri kimi möhtəşəm bir kollektivlə səsləndirdik. Məşqlər üçün vaxtın azlığına baxmayaraq çıxışımız uğurlu oldu".

AzərTAc xəbər verir ki, bu sözləri jurnalistlərə müsahibəsində Litva Kamera Orkestrinin musiqi direktoru, violin ifaçısı Sergey Krilov demişdir.

Tanınmış musiqiçi Qəbələ festivalının dünya səviyyəli bir tədbir olduğunu və əla təşkil edildiyini bildirmişdir: "Mən Azərbaycanda I Beynəlxalq M.Rostropoviç Festivalında da iştirak etmişəm. Burada biz bir daha Azərbaycan musiqisinin ecazkarlığının, xalqınızın yüksək qonaqpərvərliyinin şahidi olduq. Sevinirəm ki, ölkənizdə klassik musiqi ifaçılarının və dinləyicilərinin sayı kifayət qədər çoxdur. Bu, ölkənizin klassik musiqi mədəniyyətinin inkişafı və beynəlxalq aləmdə nüfuzunun artması deməkdir. Yerli və xarici musiqiçilərin iştirak etdikləri Qəbələ festivalı, eyni zamanda, musiqi vasitəsilə mədəniyyətlərarası dialoqa öz töhfəsini verir. Belə böyük bir tədbiri təşkil edənləri təbrik etmək lazımdır".

Azərbaycan.- 2012.- 2 avqust.- S. 8.