RWE Azərbaycanla əməkdaşlığını möhkəmləndirir

RWE Avropada ən iri enerji təchizatçılarından biridir. Bu konsern enerjidaşıyıcılarının hasilatı və istehsalı, nəqli və satışı üzrə də ixtisaslaşıb. RWE-nin əməkdaşlarının ümumi sayı 70 min nəfərdən, enerji ilə təmin etdiyi istehlakçıların sayı 16 milyondan çoxdur. Mavi yanacaqla isə 8 milyon nəfərə yaxın istehlakçını təmin edir.

Vətəni Almaniya olsa da, Böyük Britaniyada və Niderlandda geniş fəaliyyət dairəsinə malikdir və bu ölkələrdə böyük nüfuz qazanıb. RWE eləcə də Mərkəzi və Cənub-Şərqi Avropada öz mövqelərini getdikcə möhkəmləndirir. Qrupun ən böyük şirkətlərindən biri bilavasitə neft-qaz kəşfiyyatı və hasilatı ilə məşğul olan RWE Deadır.

RWE Dea Avropada, Şimali Afrikada və Xəzər regionunda kəşfiyyat və hasilatla məşğul olur. Şirkətin bu sahədə 110 ildən çox zəngin təcrübəsi var. Geologiya və geofizika, eləcə də qazma və hasilat sahəsində ən müasir üsulları mənimsəməsi ona şöhrət qazandırıb. RWE Dea həmişə öz əməkdaşlarının şəxsi təşəbbüslərinə və yaradıcı potensialına arxalanır.

Şirkət ilk növbədə Almaniyanın enerjidaşıyıcıları ilə təminatına böyük töhfə verir. Burada söhbət Aşağı Saksoniyadan hasil etdiyi təbii qazdan və zəngin "Mittelplate" yatağından çıxardığı neftdən gedir. Şirkət bu gün də Almaniyanın ərazisindəki zəngin qaz yataqlarının işlənməsində iştirak edir. İstismarda olan yataqlardan isə hər gün iki milyard kubmetrdən çox təbii qaz çıxarır.

RWE Dea 1987-ci ildən, yəni "Mittelplate"dən hasilata başlandığı vaxtdan layihədə aparıcı şirkət kimi fasiləsiz surətdə neft əldə edir. Buradan hər il çıxarılan 1,5 milyon tona yaxın neft Almaniyanın ümumi qara qızıl hasilatının yarıdan çoxuna bərabərdir. Hesablamalar isə göstərir ki, "Mittelplate" gələcəkdə daha 20-25 milyon ton neft verə bilər.

Fəallıq, səriştə, məsuliyyət RWE Dea-nın müvəffəqiyyətlərini səciyyələndirən əsas şərtlərdir. Dünyada qaza tələbat artdıqca, şirkətin bu sahədəki uğurları daha mühüm əhəmiyyət kəsb edir.

RWE Dea-nın son illərdə ən çox fəallıq göstərdiyi və ümid bəslədiyi regionlardan biri də Şimali Afrikadır. Ötən bir neçə ildə şirkət Misirdə yeni təbii qaz və xam neft mənbələri aşkar edib. Əlcəzairdə və Liviyada tapdığı ehtiyatlar isə heç də bundan az deyil. Bundan əlavə, şirkət Mavritaniyada və Mərakeşdə yataqların axtarışı və kəşfiyyatı lisenziyalarında iştirak edir. Onun maraq göstərdiyi regionlardan biri də Şimal dənizidir. Xəzər regionuna gəldikdə isə deyə bilərik ki, RWE Dea Azərbaycan və Türkmənistanla əməkdaşlıq etməyə başlayıb. Hədəfdə isə Yaxın Şərq və Qərbi Afrikadır.

RWE dünyada etibarlı tərəfdaş kimi tanınır. Ölkəmizə 2009-cu ildə gəlib. 2010-cu il martın 10-da isə ARDNŞ-lə RWE Dea şirkəti arasında Xəzər dənizinin Azərbaycan sektorunda yerləşən "Naxçıvan" perspektiv strukturunun kəşfiyyatı, işlənməsi və hasilatın pay bölgüsü sazişinin əsas kommersiya prinsip və şərtlərinin razılaşdırılmasına dair qarşılıqlı Anlaşma Memorandumu imzalanıb.

Həmin gün Prezident İlham Əliyev RWE-nin idarə heyətinin sədri Yurgen Qrosmanın başçılıq etdiyi nümayəndə heyətini qəbul etmişdi. Y.Qrosman bu sənədin imzalanmasını gələcək əməkdaşlığın yaxşı başlanğıcı kimi qiymətləndirmiş və onun uğurla inkişaf edəcəyinə ümidvar olduğunu bildirmişdi. Bu, RWE-nin Azərbaycanla əməkdaşlığının və tərəfdaşlığının çox uğurlu bir təməli idi. Həmin sənədin imzalanmasını şirkətin Azərbaycanda fəaliyyət göstərməsi üçün giriş qapısı adlandırıblar.

ARDNŞ-lə RWE-nin birgə işləyəcəyi "Naxçıvan" perspektiv strukturu Abşeron yarımadasından 90 kilometr cənubda, sahildən 55 kilometr aralıdadır. Burada suyun dərinliyi 120 metrdən 750 metrə qədər dəyişir. Struktur Azərbaycanın zəngin təbii qaz yataqlarından olan "Bahar"ın və "Bulla dəniz"in əhatəsində yerləşir. "Naxçıvan" strukturu 1960-cı ildə aparılan seysmik kəşfiyyatlar nəticəsində aşkar edilmişdi. Burada axtarış qazmasına başlamaq isə 1994-cü ildə qismət oldu.

RWE-nin strukturla bağlı müraciətinə əsasən tərəflər arasında xeyli müddət danışıqlar aparıldı. Sözügedən sənədin imzalanmasına zəmini də həmin danışıqlar yaratdı. İmzalanmış memoranduma əsasən "Naxçıvan" strukturunun kəşfiyyatı, işlənməsi və hasilatın pay bölgüsü üzrə gələcək danışıqların aparılması üçün RWE Dea şirkətinə müstəsna hüquq verildi.

RWE-nin Azərbaycana marağını onun hər il Bakıda keçirilən beynəlxalq neft-qaz sərgisində son dövrlərdəki mütəmadi iştirakı da təsdiqləyir. Keçən ilki 18-ci sərgidə şirkətin daxili əlaqələr şöbəsinin rəhbəri Daniela Ruttenatla həmsöhbət olmuşduq. O bildirmişdi ki, şirkətin Azərbaycana, burada keçirilən tədbirlərə marağı böyükdür və "Naxçıvan"da qazma işlərinə başlayacaqları günü səbirsizliklə gözləyirlər. Bu ilin iyun ayında keçirilən 19-cu sərgidə isə şirkətin yeni müəssisələr üzrə baş vitse-prezidenti, doktor Hans-Herman Eke dedi ki, "Naxçıvan" strukturunda hasilatın pay bölgüsü sazişi çərçivəsində işlərə başlamaqla yanaşı, ARDNŞ-lə digər layihələrdə iştirak etmək fikrimiz də var.

RWE qrupu həm də "Nabukko" qaz kəməri layihəsinin 6 tərəfdaşından biridir. Xatırladaq ki, "Şahdəniz" qaz-kondensat yatağını işləyən konsorsium bu il iyun ayının sonunda Cənub-Şərqi və Mərkəzi Avropa istiqamətində potensial ixrac marşrutlarının qiymətləndirilməsini yekunlaşdırdı. Türkiyə-Bolqarıstan sərhədindən Avstriyanın Baumqarten məntəqəsinədək bir marşrutu nəzərdə tutan "Nabukko" layihəsi "Şahdəniz" qazının Mərkəzi Avropaya potensial ixracı üçün boru kəməri variantı kimi seçildi. Eyni meyarlar əsasında konsorsium bu ilin fevral ayında Trans-Adriatik Boru Kəməri (TAP) layihəsini qazın İtaliyaya ixracı üçün potensial marşrut kimi seçmişdi. Beləliklə, Azərbaycan qazını hansı kəmər daşıyacaq - "Nabukko", yoxsa TAP? Konsorsium bununla bağlı seçimini təxminən bir ildən sonra edəcək. Əgər gələcəkdə Azərbaycan qazını dünya bazarlarına "Nabukko" apararsa, onda əlbəttə ki, RWE-nin ölkəmizlə əməkdaşlığı və tərəfdaşlığı daha yüksək bir mərhələyə qədəm qoya bilər.

Flora SADIQLI

Azərbaycan.- 2012.- 3 avqust.- S. 4.