Yuri Başmet: Bu festivalda iştirakım mənim üçün həm karyera, həm də Azərbaycanı yaxından tanımaq baxımından vacibdir

"Qəbələ IV Beynəlxalq Musiqi Festivalının konsertlərində mənim ifamı dinləyən yerli və xarici tamaşaçılardan çox razıyam. Mən dinləyicilərimin gündən-günə artdığını hiss edirəm. Hər konsertdə yeni dostlar, klassik musiqini dərk edən dinləyicilər tapıram".

AzərTAc xəbər verir ki, bu sözləri "Yeni Rusiya" Dövlət Simfonik Orkestrinin bədii rəhbəri və baş dirijoru, "Moskva solistləri" kamera ansamblının qurucusu, "Qremmi" mükafatının sahibi Yuri Başmet Qəbələ şəhərində keçirilən mətbuat konfransında demişdir.

Görkəmli musiqiçi Azərbaycan musiqisi barədə ilk dəfə dahi Rəşid Behbudov və Müslüm Maqomayev ilə tanışlığı zamanı məlumat əldə etdiyini bildirmişdir. Yuri Başmet hər dəfə Qəbələdə keçirilən beynəlxalq musiqi festivalına dəvət edilərkən xoş hisslər keçirdiyini və bu möhtəşəm tədbirdə həvəslə iştirak etdiyini bildirmişdir. O demişdir: "Bu festivalda iştirakım mənim üçün həm karyera, həm də Azərbaycanı yaxından tanımaq baxımından vacibdir. Ümumiyyətlə, son bir ildə Azərbaycan çox dəyişmiş, paytaxtınız, həmçinin Qəbələ gözəlləşmiş və daha da müasirləşmişdir. Buranın təbiəti, insanları çox xoşuma gəlir. Çoxlu dostlar qazanmışam. Gələn il də bu festivalda böyük məmnuniyyətlə iştirak edəcəyəm".

Azərbaycan.- 2012.- 4 avqust.- S. 4.