Aleksandr Çaykovski: Mən Xocalı matəm musiqisini yazmaqla bir çox ölkələrdə müharibənin dəhşətlərini yaşayan insanlara dəstək olmaq istəmişəm

 

"Mən əvvəlcə Xocalı faciəsi haqqında məlumat topladım, müxtəlif videokadrlara baxdım, Azərbaycanın musiqi nümunələrini disklər vasitəsilə dinlədim və bunlardan bəhrələnərək bu əsəri yazdım".

AzərTAc xəbər verir ki, bu sözləri Moskva Dövlət Filarmoniyasının bədii rəhbəri, P.Çaykovski adına Moskva Dövlət Konservatoriyasının kafedra müdiri, Rusiya Federasiyasının xalq artisti, xüsusi olaraq Qəbələ IV Beynəlxalq Musiqi Festivalı üçün "Xocalı" matəm musiqisini yazmış məşhur bəstəkar Aleksandr Çaykovski Qəbələdə keçirilən mətbuat konfransında jurnalistlərin suallarını cavablandırarkən demişdir.

Aleksandr Çaykovski bildirmişdir ki, bu festivalın sorağı dünyanın hər yerindən gəlir, burada tanınmış musiqiçilər Azərbaycan və Avropa bəstəkarlarının əsərlərini məharətlə ifa edirlər. O, Heydər Əliyev Fondunun dəstəyi və yaxın dostu Dmitri Yablonskinin təklifi ilə bu festival üçün "Xocalı" matəm musiqisini yazdığını bildirmişdir.

A.Çaykovski piano, viola, tar, violonçelkamera orkestri üçün bu əsəri yazmaqla bir çox ölkələrdə müharibənin dəhşətlərini yaşayan bütün insanlara musiqiçilərin də dəstək olduğunu bildirmişdir. Bəstəkar demişdir: "Bu axşam bu musiqinin ifası ilə festivalın iştirakçısı olan bütün tamaşaçılar, eləcə də bütün dünya ictimaiyyəti müharibənin ağrı-acısını yaşayan insanların vəziyyətini başa düşəcəkdir. Ümid edirəm ki, axıdılan qana və tökülən göz yaşlarına son qoyulacaqdır".

 

 

Azərbaycan.- 2012.- 4 avqust.- S. 4.