Əli ƏHMƏDOV: Sürətlə dəyişən və inkişaf edən Azərbaycanda idman sahəsi də tərəqqi dövrünü yaşayır

Azərbaycanın bugünkü inkişafının əsasında ümummilli lider Heydər Əliyevin müəyyənləşdirdiyi siyasət durur. Bu siyasəti uğurla davam etdirən Prezident İlham Əliyevin rəhbərliyi altında Azərbaycan ardıcıl nailiyyətlər əldə edir, parlaq qələbələr qazanır.

AzərTAc xəbər verir ki, bunu jurnalistlərə açıqlamasında Yeni Azərbaycan Partiyası (YAP) sədrinin müavini-icra katibi, Milli Məclisin deputatı Əli Əhmədov demişdir.

Ə.Əhmədov qeyd etmişdir ki, sürətlə dəyişən və inkişaf edən Azərbaycanda bütün sahələr kimi, idman sahəsi də tərəqqi dövrünü yaşayır və ölkəmiz artıq dünyada idman dövləti kimi qəbul edilir.

Bütün bunlar isə Azərbaycan vətəndaşlarında böyük sevinc hissləri yaşadır. Lakin bununla belə, çox az sayda adamlar da var ki, dövlətimizin nailiyyətlərinə sevinə bilmirlər. Onlar, özlərinin qara fikirlərini mətbuat səhifələrinə çıxarmaq üçün kiçik bir bəhanə axtarırlar. Olimpiya Oyunlarının başa çatmasını gözləməyən Azərbaycan müxalifəti ölkəmizin ümumi inkişafına kölgə salmaq məqsədi ilə əsassız təbliğat aparmağa cəhd göstərdi. Amma zaman göstərdi ki, müxalifətin bu günə qədər dediklərinin Azərbaycanın inkişafı ilə heç bir əlaqəsi yoxdur. Azərbaycan idmançılarının Londonda keçirilmiş XXX Yay Olimpiya Oyunlarında göstərdikləri şücaət, bunun nəticəsi olan medallar göstərdi ki, müxalifətçilər ölkəmizin uğurlarına sevinə bilmirlər. Bu isə artıq onların xislətinə çevrilmişdir. Müxalifətin Azərbaycanın uğurlarına sevinməmək xüsusiyyəti onların siyasətinin əsas mahiyyətini təşkil edir. Lakin bütün bunlara baxmayaraq, Azərbaycan seçdiyi yolla uğurla irəliləyir. Ən başlıcası odur ki, kimin nə deməsindən asılı olmayaraq, ölkəmiz inamla yüksəlir, inkişaf edir və parlaq qələbələr qazanır.

Azərbaycan.- 2012.- 16 avqust.- S. 3.