İslam Əməkdaşlıq Təşkilatının üzvü olan ölkələr Ermənistanı silahlı qüvvələrini işğal etdiyi Azərbaycan ərazilərindən çıxarmağa çağırmışlar

Təşkilatın qəbul etdiyi bəyannamədə Ermənistanın Azərbaycana qarşı hərbi təcavüzü qəti surətdə pislənmişdir

İslam Əməkdaşlıq Təşkilatı (İƏT) Ermənistanın Azərbaycan torpaqlarını işğal etməsini növbəti dəfə kəskin qınamışdır.

Azərbaycan Xarici İşlər Nazirliyinin mətbuat xidmətindən bildirmişlər ki, avqustun 14-15-də Səudiyyə Ərəbistanı Krallığının Məkkə şəhərində keçirilən İslam zirvə toplantısının dördüncü fövqəladə sessiyasında dünya müsəlmanlarının narahatlığına səbəb olan məsələlər müzakirə olunmuşdur. Bundan əlavə, sessiyada Suriya, Fələstin, Mali və Myanmadakı vəziyyətlə bağlı müvafiq qətnamələr qəbul edilmişdir.

Zirvə toplantısının sonunda müzakirə olunmuş məsələlərlə bağlı İƏT-in üzvü olan ölkələrin mövqeyini əks etdirən yekun bəyannamə qəbul olunmuşdur. Bəyannamədə İƏT-in üzvü olan ölkələr Ermənistanın Azərbaycana qarşı təcavüzünü pisləmiş və Ermənistanı silahlı qüvvələrini işğal olunmuş Azərbaycan ərazilərindən çıxarmağa çağırmışlar.

AzərTAc

Azərbaycan.- 2012.- 17 avqust.- S. 3.