Ulu öndər Heydər Əliyevin əziz xatirəsi ehtiramla yad edildi

1969-cu ildən Azərbaycanın mürəkkəb və taleyüklü qayğılarını çiyninə alaraq onu qısa bir zaman kəsiyində postsovet məkanında qabaqcıl respublikalardan birinə çevirən ulu öndər Heydər Əliyev sonradan xalqımızın ən parlaq siyasi siması, eləcə də dünya siyasi elitasının görkəmli şəxsiyyətlərindən biri kimi tarixə öz imzasını yazdı. İkinci dəfə hakimiyyətə qayıdanda ölkədə həllini gözləyən problemlərin böhran həddinə çatması onun siyasi əzmini qıra bilmədi, iradəsini sarsıtmadı. Ulu öndər yalnız özünə məxsus olan cəsarətlə, möhkəm iradəli liderə xas bacarıqla qısa zamanda cəbhədə atəşkəsə nail oldu, dövlətçiliyi möhkəmləndirdi, vətəndaş cəmiyyətini formalaşdırdı, dünyaya səpələnmiş soydaşlarımızın birliyini yaratdı. Ən vacibi, dünyanın nəhəng dövlətlərinin strateji maraqlarını Azərbaycanın mənafeyi istiqamətində birləşdirməyə nail oldu. Xalqımızın tarixində, ictimai-siyasi həyatında ulu öndər qədər misilsiz xidmətlər göstərən ikinci dövlət xadimi olmamışdır. Heydər Əliyev dövrün tarixini yaradan və yaşadan, onun fövqündə dayanmağı bacaran, dövlət idarəçiliyi və siyasi təlimlər elminin müntəxəbatını gözəl bilən fenomenal bilik sahibi idi.

Azərbaycan xalqının ümummilli lideri Heydər Əliyevin vəfatının doqquzuncu ildönümüdür. Onun böyüklüyü təkcə mənsub olduğu ölkədə deyil, ölkənin hüdudlarından çox-çox uzaqlarda da anılır. Dünən səhər açılandan yaşından, vəzifəsindən asılı olmayaraq ölkənin minlərlə vətəndaşı ulu öndərə məhəbbətini ifadə etmək üçün Fəxri xiyabana gələrək məzarını ziyarət edirdi.

Onlardan biri Ofelya Əhmədova idi. O, müəllimdir. Söhbət zamanı dedi: - Mən Masallıdan gəlmişəm, uzun illərdir rayonda fizika-riyaziyyat müəllimi işləyirəm. Keçən il qış sərt keçirdi. Qar yolları bağladığından ulu öndərin məzarını ziyarət etmək arzusu ürəyimdə qaldı. Dağ rayonundan gəlmək çətin idi. Çox şükür, bu dekabr hava xoşdu, ona görə heç bir əziyyət çəkmədən Bakıya gəldim və bu gün saysız-hesabsız ziyarətçilərdən biri olmağımdan qürur hissi keçirirəm. Axı ulu öndər Heydər Əliyev müəllimə böyük dəyər verirdi. Hər dəfə çıxışlarında təhsil məsələsinə toxunur, müəllim sənətini yüksək qiymətləndirirdi. Sağlığında dəfələrlə müəllimlərin əməkhaqlarını artırmışdı. Məktəblərin səliqə-sahmanlı, müasir tələblərə cavab verməsini tələb edirdi. Ən yüksək keçid balı ilə ali məktəblərə daxil olan tələbələrə Prezident təqaüdünün verilməsi də onun təşəbbüsüdür. Bacımın nəvəsi bir neçə il öncə Tibb Universitetinə daxil olarkən Prezident təqaüdünə layiq görüldü və sonadək əla oxudu. Prezident İlham Əliyev ulu öndərin təhsilə və müəllimlərə olan qayğısını əsirgəmir. Son illər ölkəmizdə, xüsusən də rayonlarda və kəndlərdə 400-dən çox yeni məktəb tikilib. Biz ulu öndərə ehtiramımızı nümayiş etdirmək, onun abidəsi önündə baş əymək üçün Masallıdan Bakıya gəlmişik. Burada gördüyüm izdiham, qələbəlik isə dahi öndərin bu gün də milyonların qəlbində yaşamasının sübutudur. Şagirdləri də ziyarətçilərin arasında görəndə ürəyim dağa dönür.

Rüstəm Qarayev, polkovnik: - Sovet dönəmində Azərbaycan kimi müsəlman respublikasında hərbi kadrlar hazırlayan milli məktəbin yaradılması mümkün olan iş deyildi. Yazılmamış qanunlara görə, belə məktəblər yalnız Rusiyada, Ukraynada və Belorusiyada ola bilərdi. Lakin Heydər Əliyev mərkəzin qoyduğu bütün qadağaları, maneələri aşaraq Azərbaycanda hərbi kadrlar hazırlayan məktəbin açılmasına nail oldu. 1973-cü ildə Bakıda C.Naxçıvanski adına ilk hərbi məktəbin açılışını etdi. Bununla da respublikada hərbi kadrların yetişdirilməsinin təməli qoyuldu. Hərb sənətinə ölkədə maraq oyandı, gənclər arasında bu sahəyə üz tutanların sayı artdı. Bu məktəb sonralar Azərbaycanda milli ordu quruculuğunda əvəzsiz rol oynadı. Bugünümüzdən keçmişə boylananda ulu öndər Heydər Əliyevin nə qədər öncəgörən olduğunu müəyyən edirsən. O zaman bir çox sahələrdə, o cümlədən hərb sahəsində yüzlərlə gənc Rusiyaya təhsil almağa gedirdi. Onların arasında Rusiyanın müxtəlif şəhərlərində qalıb çalışanlar da oldu. Mən də onlardan biri kimi uzun illər Ukraynada işlədim. Lakin vətənimin mənim kimi hərbçi kadrlara ehtiyacı olduğu üçün 1998-ci ildə Azərbaycana qayıtdım. C.Naxçıvanski adına Ali Hərbi Məktəbin minlərlə məzunu bu gün bizi, yaşlı nəslin nümayəndələrini əvəz edir. Bunlar hamısı ulu öndərin uzaqgörən siyasətinin nəticəsidir.

Samaya Aslanova, təqaüdçü: - Təbiətin verdiyi ömrü hər birimiz yaşayırıq, amma ulu öndər hamıdan fərqli və ləyaqətli bir ömür sürdü. Mən uzun illər Bakının 53 saylı orta məktəbində ibtidai sinif müəllimi işləmişəm. Ulu öndərin dəfələrlə toplantılarında olmuşam. Onun hər kəlməsi çox dəyərli və mənalı idi. Müəllimlərə həmişə sevgiylə, hörmətlə yanaşar və bunu hər kəsə tövsiyə edərdi. Onun təhsilə, məktəbə yönümlənən siyasi xətti ölkəmizdə uğurla davam etdirilir. Hər gün yeni məktəblər tikilir, onların müasir avadanlıqlarla təchiz edilməsinə xüsusi diqqət yetirilir. Sevindirici haldır ki, ölkə Prezidenti İlham Əliyev bu strategiyanı layiqincə davam etdirir.

Azərbaycan Texniki Universitetinin Konstruksiya və kompozisiya materiallarının texnologiyası kafedrasının baş laborantı Səmayə Şahnəzərova bizimlə söhbətində bildirdi ki, müasir Azərbaycan dövlətinin qurucusu, dünyanın siyasət korifeylərindən biri, ümummilli lider Heydər Əliyevin hakimiyyətə gəldiyi dövrlərə nəzər salsaq görərik ki, hər iki halda Azərbaycan böhranlı vəziyyətdə olmuşdur. Doğrudur, ulu öndər Heydər Əliyev 1969-cu ildə rəhbərliyə gələndə bugünkü kimi Azərbaycan torpaqları erməni təcavüzünə məruz qalmamış, ərazilərinin 20 faizi işğal altına düşməmişdi. Lakin həmin dövrün böhranlı vəziyyəti tamam başqa cür idi: "O illərdə Azərbaycan Respublikası keçmiş Sovetlər İttifaqının tərkibində ən geridə qalan müttəfiqlərdən biri idi. Demək olar ki, Azərbaycanın kənd təsərrüfatı, ağır və yüngül sənayesi sahəsində ürəkaçan bir göstərici yox idi. Ədəbiyyat, incəsənət, elm, mədəniyyət sahələrində durğunluq hökm sürürdü. Rəsmi Moskvanın Azərbaycanın inkişafına münasibətinin başqa respublikalara nisbətən fərqli olduğu aydın hiss olunurdu. Lakin tezliklə ulu öndər Heydər Əliyevin sayəsində hər şey dəyişdi, Azərbaycan sürətlə inkişaf edən ölkəyə çevrildi.

Bir pedaqoq kimi deyə bilərəm ki, yetişən gəncliyin Heydər Əliyevin ideyaları ruhunda tərbiyə olunması, müdrik rəhbərimizin qurub-yaratdığı müstəqil dövlətimizin şanlı tarixinin onlara elmi əsaslarla mənimsədilməsi və təbliği vacib məsələdir. Azərbaycan yaşadıqca ulu öndərin adı onunla qoşa çəkiləcək. Ulu öndərin çəkdiyi zəhmət xalqımızın gözü önündədir. Biz ulu öndərin xalqa sədaqətli xidmət mədəniyyətinin təbliğatçılarına çevrilməli, vətəni onun kimi sevməli və sevdirməliyik.

"Azərbaycan Dövlət Dəmiryolu" QSC-nin əməkdaşları Məzahir Səfərov və Müseyib Həmzəyev 2003-cü üldən bu günədək dövlətimizin keçdiyi inkişaf yolundan, qazandığı uğur və nailiyyətlərdən söz açaraq bildirdilər ki, Azərbaycanın regionda lider dövlətə çevrilməsi xalqımızın ümummilli liderinin, həyat və fəaliyyətini bütünlüklə müstəqil respublikamızın çiçəklənməsinə, onun dünya birliyində layiqli yer tutmasına yönəltmiş ulu öndər Heydər Əliyevin xidmətidir. Ümummilli liderin uzaqgörən və alternativsiz siyasəti bu gün Prezident İlham Əliyev tərəfindən uğurla davam etdirilir.

Müstəqil Azərbaycan dövlətinin qurulmasında və dövlətçiliyinin qorunub saxlanmasında xilaskarlıq simvolu kimi yaşayan ulu öndər Heydər Əliyevin misilsiz xidmətlərini saymaqla qurtarmaz. Ən əsası isə odur ki, ümummilli lider Azərbaycanın sivil dövlət kimi inkişafının əsasını qoymuşdur. Çətin və əzablı həyat yolu keçmiş Azərbaycanın bugünkü inkişafına baxanda böyük qürur hissi keçirirsən. Ölkəmiz heç vaxt görünməmiş qüdrətli bir inkişafa nail olub.

Azərbaycan Prezidenti yanında Dövlət İdarəçilik Akademiyasının tələbəsi Həbib Misirov: - Azərbaycan xalqının xoş və firavan həyatına ömrünü həsr edən ümummilli lider Heydər Əliyevin bəşəri şəxsiyyət olması yeni tariximizin bütün səhifələrində özünü təsdiqləyir. Dərin kədər və hüznlə qeyd etməliyik ki, 2003-cü il dekabr ayının 12-də Azərbaycan xalqı ağır itki ilə üzləşdi. Ümummilli lider Heydər Əliyev kimi tarixi şəxsiyyətini itirən xalqımızın həmin ərəfədə keçirdiyi kədər böyük idi. Lakin bu uzun sürmədi. Ulu öndər özü qədər inandığı siyasi varisini sevimli xalqına və müstəqilliyini bərpa etmiş Azərbaycan dövlətinin bugünü və sabahını etibarlı əllərə tapşırıb gedirdi. Məhz bu baxımdan nigarançılığa əsas yox idi.

Ulu öndərin anım günü yalnız matəm libaslı deyil. Xalqımızın çoxsaylı nümayəndələri müstəqil dövlətimizin memarı və qurucusunun müqəddəs məzarını ziyarət etmək üçün dəstə-dəstə Fəxri xiyabana üz tutmuşdular. Ziyarətçilər belə qüdrətli dövlətin banisi olduğu üçün ümummilli liderlə daim fəxr edəcəklərini dilə gətirir, cənab Prezidentin ətrafında sıx birləşməklə, respublikamızın inkişafında öz əmək və zəhmətlərini bundan sonra da əsirgəməyəcəklərini əminliklə ifadə edirdilər.

Öz əməli, xilaskarlıq missiyası ilə tarixdə silinməz izlər qoymuş şəxsiyyətlər azdır. Amma hər xalqın, millətin təkamül tarixində belə şəxsiyyətlər olub. Kifayət qədər mürəkkəb və keşməkeşli bir dönəmdə xalqının köməyinə çatan ulu öndər Heydər Əliyev Azərbaycanın inkişaf tarixində silinməz izlər qoymuşdur. Onun titanik fəaliyyəti nəticəsində Azərbaycan dünyanın siyasi meydanında öz sözünü deyə bilən qüdrətli dövlətə çevrilib. Başqa xalqların, millətlərin əsrlərlə əldə elədiyini Azərbaycan xalqı bir neçə ilə gerçəkləşdirdiE

Samir Mustafayev, tələbə: - Siyasi varislik qısa müddət ərzində Prezident İlham Əliyevin əməli fəaliyyətində öz təsdiqini tapmış oldu. Azərbaycan təkcə yerləşdiyi regionda deyil, inkişaf sürətinə görə Avropa və dünya dövlətləri arasında seçildi. Ötən 9 il ərzində ulu öndərin Fəxri xiyabandakı müqəddəs məzarı əsl ziyarətə çevrilib. Yaşından və ictimai fəaliyyətindən asılı olmayaraq, xalqımızın geniş təbəqəsinin nümayəndələri - əmək kollektivləri, tələbə-gənclər, bir sözlə, hamı nəinki dekabr ayının 12-də, ilin bütün fəsillərində ümummilli liderin məzarını ziyarət edir, dövlətimizə sədaqətli xidmətdə ulu öndərin tövsiyələrinə bundan sonra da sadiq qalacağına söz verir.

"Təmiz Şəhər" ASC ilə "Nurgün" Şirkətlər Qrupunun kollektivi də builki anım tədbiri iştirakçıları sırasında idi. Bu əmək kollektivlərinin fikirlərini ifadə edən Xəyyam Əsgərov, Ceyhun Əhmədov və Sabit Zeynalov bildirdilər ki, Heydər Əliyevin Azərbaycanın inkişafındakı xidmətləri unudulmazdır. Məhz bunun sayəsində Azərbaycan xalqı özünün xoşbəxt günlərini yaşayır, qurub-yaratmaq əzmi ilə çalışır. Hər bir dövlətin möhkəmliyi, sosial-iqtisadi qüdrəti onun vətəndaşlarının torpağa bağlılığından, vətənə olan sevgisindən, geniş elmi təfəkkürə, yüksək dünyagörüşə, dərin biliyə, bacarığa, işgüzarlıq qabiliyyətinə və digər ali insani keyfiyyətlərə malik olmasından çox asılıdır.

Respublikamızın bütün şəhər və rayonlarının nümayəndələri, paytaxt sakinləri, xarici ölkələrdən gəlmiş çoxsaylı qonaqlar dünən səhər tezdən axşama kimi Fəxri xiyabana gələrək Azərbaycan xalqının ümummilli liderinin məzarını ziyarət etdi, xatirəsini əziz tutdu, ruhu qarşısında baş əydilər. Azərbaycanın özü qədər əbədi olan ümummilli lider Heydər Əliyev sevdiyi xalqının qəlbində böyük məhəbbətlə anılır, yaşanır və əbədi olaraq bundan sonra da yaşayacaqdır.

Rəsmiyyə RZALI,

Məhəmməd NƏRİMANOĞLU,

Azərbaycan.-2012.- 13 dekabr.- S.4.