Uğurlu startın möhtəşəm finişi

BAŞ REDAKTORDAN

Dekabrın 8-də Avropa Olimpiya Komitəsinin Baş Assambleyasında 2015-ci ildə ilk Avropa Olimpiya Oyunlarının Azərbaycanda keçirilməsi haqqında qərar qəbul edilmişdir!

Sevinc və fərəh doğuran, tarixi bir qərardır!

Hətta dövlət başçısı cənab İlham Əliyev bu münasibətlə Azərbaycan xalqını təbrik etmişdir!

İkinci fəxarətimiz odur ki, bu hadisə cari il ərzində Azərbaycan dövlətinin nə birinci, nə də sonuncu nailiyyəti idi!

Artıq biz də dünyada sayılıb-seçilən, fərqləndirilərək etimad göstərilməyə layiq görülən dövlətlər sırasındayıq!

Deməli, tutduğumuz yol doğru, gördüyümüz işlər möhtəşəm, qazandığımız uğurlar ürəkaçan və təqdirəlayiqdir.

* * *

2012-ci ilin qoca tarixin çoxsaylı səhifələrindən birinə çevriləcəyinə barmaqla sayılacaq qədər günlər qalır!

Yaşımızın və müstəqilliyimizin üzərinə daha bir il əlavə olunacaqdır!

Yola salınan hər il eyni zamanda növbəti il üçün təməl funksiyasını daşıyır.

Təməl nə qədər möhkəm qoyularsa, tikilən bina bir o qədər əzəmətli alınar!

Startdan sıçrayışla çıxmağımız həm də finişə daha böyük nəticələrlə çatmağımızı təmin edir!

Bu mənada 2012-ci ili Azərbaycanın düşünülmüş, sürətli və davamlı inkişafı yolunda növbəti uğurlu addım kimi qiymətləndirmək mümkündür. Özü də növbəti 2013-cü ildə həllini gözləyən bütün məsələlərin yüksək səviyyədə reallaşdırılmasına təməl olacaq start nöqtəsi kimi baxmaq şərtilə!

Bəs 2012-ci il yaddaşlarda necə qalır, Azərbaycan xalqı və dövləti öz tarixinə hansı zəfərləri həkk etdirir?

İlin uğurlarına qısa şəkildə birgə nəzər salaq:

SİYASİ SAHƏDƏ. Dünyanın 155 dövlətinin dəstəyi ilə BMT Təhlükəsizlik Şurasının üzvü seçilən Azərbaycan may ayında bu mötəbər qurumun iclasına sədrliyini də həyata keçirdi;

İQTİSADİ SAHƏDƏ. İqtisadiyyatı ən yüksək templərlə inkişafı sayəsində dövlət büdcəsi, xalqın rifahı yüksəldi, iri həcmli investisiya layihələri gerçəkləşdirildi, Trans-Anadolu Qaz Kəmərinə (TANAP) həyat vəsiqəsi verildi. Azərbaycan iqtisadiyyatı rəqabətdavamlılığına görə dünya miqyasında 46-cı, MDB məkanında birinci yerə çıxdı;

İDMAN SAHƏSİNDƏ. XXX London Yay Olimpiya Oyunlarında Azərbaycan əvvəlki bütün rekordlarını təzələdi, 2 qızıl, 2 gümüş və 6 bürünc medalla dünyada 30-cu, Avropada 15-ci yeri tutdu;

MƏDƏNİYYƏT SAHƏSİNDƏ. Avropa mahnı yarışmasının qalibi olaraq 42 ölkənin iştirakı ilə Bakıda "Eurovision"un 57-ci müsabiqəsini böyük uğurla və orijinal formada reallaşdırdıq.

Bütün bunlar dünya miqyasında diqqətçəkən məsələlər idi və Azərbaycanın beynəlxalq imicinin yüksəlməsinə xidmət edirdi. Eyni zamanda dünyaya inteqrasiya və zəruri təcrübənin toplanılması baxımından böyük əhəmiyyət daşıyırdı. Ən maraqlı məqamlardan biri budur ki, Bakıda keçirilən beynəlxalq miqyaslı tədbirlər 2012-ci ildə daha çox və geniş tərkibli idi. Bütövlükdə isə paytaxtımızın yüksək səviyyəli məclis və yarışların məharətlə keçirildiyi ünvan imici növbəti dəfə təsdiqləndi. Onlardan ən yaddaqalanlarını bir daha xatırlatmaq istəyirik.

Beləliklə, 2012-ci ildə Bakıda:

21-27 avqustda yeniyetmələr arasında güləş üzrə dünya çempionatı keçirilmişdir. 41 ölkədən 850-dək idmançının qatıldığı bu yarışlarda 9-u qızıl olmaqla 19 medal qazanıldı.

21-23 sentyabrda ulu öndər Heydər Əliyevin xatirəsinə həsr olunmuş güləş üzrə "Qızıl Qran Pri" beynəlxalq turniri oldu. Birinci dəfə keçirilən bu yarış zamanı idmançılarımız 5 qızıl, bütövlükdə isə 22 medal əldə etdilər.

22 sentyabr-13 oktyabrda 16 ölkənin komandalarının iştirakı ilə futbol üzrə U-17 qadınlararası dünya çempionatı keçirildi. Bu, FİFA bayrağı altında Azərbaycanda təşkil olunan ilk böyük turnir və Avropada birinci U-17 qadınlararası dünya çempionatı idi.

28 oktyabrda GT3 və klassik "Formula-1" yarışlarının final mərhələsi təşkil edildi. Dünyanın 65 televiziya kanalının birbaşa yayımladığı reportajı 130 milyondan çox tamaşaçı izləmişdir.

4-5 oktyabrda İkinci Beynəlxalq Humanitar Forum 700 nəfərin iştirakı, o cümlədən 70 ölkənin və 7 mötəbər beynəlxalq təşkilatın təmsilçiliyi ilə baş tutmuşdur.

Noyabr ayında isə Bakıda 3 mühüm tədbir:

Beynəlxalq İnternet İdarəetmə Forumu;

Asiya siyasi partiyalarının beynəlxalq konfransının VII Baş Assambleyasının iclası;

Qara Dəniz İqtisadi Əməkdaşlıq Təşkilatı Parlament Assambleyasının zirvə toplantısı keçirilmişdir.

Bir il üçün kifayət qədər qüvvə, vəsait və hazırlıq tələb edən tədbirlərdir! Hamısı da uğurla, iştirakçıların təşəkkür və razılığı ilə başa çatmışdır. Etiraf edək ki, beynəlxalq səviyyəli tədbirlərin keçirilməsi sadə və asan məsələ deyil! Bir neçə strukturun əlbir və əlaqəli, nizamlı fəaliyyətini tələb edir və artıq Azərbaycanda belə bir "mexanizm" hazırlanmışdır və daim qüsursuz işləyir!

Mexanizm deyəndə nələri nəzərdə tuturuq?

Əvvəla, səriştəli və təcrübəli kadrların mövcudluğunu. Əsas məqamlardan biri məhz budur və heç də əbəs deyilməyib ki, hər şeyi kadrlar həll edir. Bu gün ölkəmizdə əcnəbi dilləri bilən, müxtəlif mövzulara həsr olunmuş tədbirləri məharətlə təşkil edən insanlar çoxdur.

İkincisi maddi-texniki bazanın olmasıdır. Artıq Azərbaycanda idman insanların həyat tərzinə çevrilib. Gənclər müntəzəm şəkildə idmanın müxtəlif növləri ilə, yaşlılar isə trenajorlarla məşğul olurlar. İdmanın dövlət siyasəti səviyyəsinə qaldırılması, məşq meydançaları, müxtəlif idman növləri ilə məşğulluq üçün şəraitin və yarış məkanlarının hazırlanması bu sahədəki uğurların rəhnidir.

Üçüncüsü yarışlara gələn idmançılara zəruri şəraitin yaradılmasıdır. Hər bir idmançı yarışa qədər idman avadanlığı və alətləri ilə məşq etməli, yarışdan sonra istirahət edib rahatlanmalı, istədiyi kimi qidalanmalıdır. Bu sahədə heç bir problem yoxdur!

Qonaqların rahatlığı da vacib şərtdir. Yarışlara xidmət edəcək hakimlər və digər heyət üzvləri, federasiyaların rəsmiləri və nümayəndələri, habelə çoxsaylı tamaşaçılar daim qayğı ilə əhatə olunur. Qonaqların təyyarə limanında qarşılanması, şəhərə gətirilərək yüksək səviyyəli hotellərdə yerləşdirilməsi, yarış keçirilən məkanlara aparılıb-gətirilməsi dəqiq şəkildə yerinə yetirilir.

Azərbaycana gələn qonaqların - idmançı, tamaşaçı və digər beynəlxalq tədbirlərin iştirakçılarının asudə vaxtlarının mənalı təşkili, onların muzeylərə, istirahət mərkəzlərinə, eyni zamanda respublikanın görməli yerlərinə aparılması ənənəyə çevrilmişdir. Belə qayğı və mehribanlıq görən, dəqiq təşkil edilmiş tədbirə qatılan qonaqlar Azərbaycandan sevgi ilə ayrılır, imkan yaranan kimi yenidən bu qonaqpərvər diyara gəlməyə can atırlar!

Dövlət başçısı cənab İlham Əliyev Avropa Olimpiya Oyunlarının Bakıda keçirilməsi münasibətilə xalqa təbrikində hadisənin əhəmiyyətini xüsusi vurğulamışdır: "...Birinci Avropa Olimpiya Oyunlarının Bakıda keçirilməsi barədə qərar böyük tarixi hadisədir. Bu, bizə göstərilən böyük inamdır, böyük etimaddır, böyük hörmətdir, eyni zamanda üzərimizə düşən böyük məsuliyyətdir".

Şübhə yoxdur ki, Azərbaycan növbəti dəfə də bu inam və etimadı doğruldacaq, hörmətə layiq dövlət və xalq olduğunu yenidən nümayiş etdirəcəkdir!

Azərbaycan.-2012.- 19 dekabr.- S.3.