Azərbaycanın xarici işlər naziri GUAM-ın baş katibi ilə görüşmüşdür

Dekabrın 19-da Azərbaycan Respublikasının xarici işlər naziri Elmar Məmmədyarov GUAM-ın baş katibi Valeri Çeçelaşvili ilə görüşmüşdür.

Azərbaycan Respublikası Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə Azərbaycan ilə GUAM arasında münasibətlərin hazırkı vəziyyəti, regionda və təşkilat çərçivəsində həyata keçirilən layihələr, həmçinin GUAM ilə digər beynəlxalq təşkilatlar arasında əməkdaşlıq məsələləri müzakirə edilmişdir.

Tərəflər BMT Baş Məclisinin GUAM ilə əməkdaşlıq barədə qəbul etdiyi qərarı və "GUAM ərazisində uzadılmış münaqişələr və onların beynəlxalq sülhə, təhlükəsizliyə və inkişafa təsiri" adlı qətnamə layihəsinə dair GUAM ilə BMT arasında razılığın əldə olunmasını müsbət qiymətləndirmişlər.

Görüşdə Valeri Çeçelaşvili məlumat vermişdir ki, rəhbərlik etdiyi təşkilatın layihəsi çərçivəsində 2013-cü il martın birinci yarısında Bakıda çirkli pulların yuyulmasına qarşı mübarizə sahəsində üçgünlük beynəlxalq seminarın keçirilməsi planlaşdırılır. BMT-nin Narkotiklər və Cinayətkarlıq üzrə İdarəsinin və ABŞ-ın maliyyə dəstəyi ilə keçiriləcək seminarda GUAM və Avropa İttifaqı ölkələrinin, ABŞ-ın, eləcə də Avropol, İnterpol və digər beynəlxalq və regional təşkilatların nümayəndəsinin iştirakı nəzərdə tutulmuşdur.

Azərbaycan.-2012.- 21 dekabr.- S.3.