Ramzan Kadırov «Heydər Əliyev» qızıl medalı ilə təltif edilmişdir

Çeçenistan Respublikasının rəhbəri Ramzan Kadırov Çeçenistan-Azərbaycan Dostluq və Əməkdaşlıq Cəmiyyətinin təqdimatına əsasən, Türkdilli Dövlətlərin Siyasətini Dəstəkləmə Fondunun yüksək mükafatına nominasiya edilmişdir.

Çeçenistan-Azərbaycan Dostluq və Əməkdaşlıq Cəmiyyətinin təqdimatı Türkdilli Dövlətlərin Siyasətini Dəstəkləmə Fondu tərəfindən bəyənilmiş və Çeçenistan Respublikasının rəhbəri Ramzan Kadırov Azərbaycan da daxil olmaqla türkdilli dövlətlər arasında münasibətlərin inkişafında müstəsna xidmətlərinə görə "Heydər Əliyev" qızıl medalı ilə təltif edilmişdir.

Bu barədə AzərTAc-a Türkdilli Dövlətlərin Siyasətini Dəstəkləmə Fondundan məlumat verilmişdir. Türkdilli Dövlətlərin Siyasətini Dəstəkləmə Fondu "Heydər Əliyev" qızıl medalını 2007-ci ildən türk və digər millətlərin və xalqların dostluq və qardaşlıq əlaqələrinin möhkəmlənməsində böyük xidmətlərə, türkdilli dövlətlərin iqtisadi, sosial-siyasi və mədəni inkişafına sanballı töhfələr vermiş görkəmli şəxsiyyətlərə təqdim edir. İndiyə qədər Azərbaycan Prezidenti İlham Əliyev, görkəmli qırğız yazıçısı Çingiz Aytmatov, Qırğız Respublikasının keçmiş prezidenti Kurmanbek Bakiyev, Türkiyənin Baş naziri Rəcəb Tayyib Ərdoğan "Heydər Əliyev" qızıl medalının laureatları olmuşlar. Çeçenistan KİV-lərində verilən məlumata görə, mükafatın Çeçenistan Respublikasının başçısı Ramzan Kadırova təqdim edilməsinə həsr olunmuş rəsmi mərasim Qroznıda keçiriləcəkdir. Bundan əlavə, Çeçenistan-Azərbaycan Dostluq və Əməkdaşlıq Cəmiyyəti Çeçenistan rəhbərinə Azərbaycan Prezidenti İlham Əliyevin Azərbaycan ilə Çeçenistan arasında dostluq münasibətlərinin nizamlanmasında və möhkəmlənməsində müstəsna xidmətlərinə görə, Çeçenistan Respublikasının ali mükafatı - Əhməd Kadırov adına orden ilə təltif olunması təklifi ilə müraciət edəcəkdir.

Azərbaycan.-2012.- 31 dekabr.- S.4.