«İRS-Herencia» ispandilli jurnalının «Müstəqilliyə gedən yol: 20 ilə retrospektiv baxış» adlı nömrəsi çap olunmuşdur

Azərbaycan Respublikasının Argentinadakı səfirliyinin məlumatına görə, "İRS" jurnalının Buenos-Ayresdə nəşr edilən ispandilli "İRS-Herencia" versiyasının "Müstəqilliyə gedən yol: 20 ilə retrospektiv baxış" adlı növbəti nömrəsi çapdan çıxmışdır.

Azərbaycan Xarici İşlər Nazirliyinin mətbuat xidmətindən AzərTAc-a bildirmişlər ki, jurnalın əsas mövzusu olan və "müstəqillik izləri" adlanan hissəsində Qanlı Yanvar hadisələri, müstəqilliyin ilk illərində ölkənin qarşılaşdığı çətinliklər və bayrağımızın tarixi barədə oxuculara maraqlı məqalələr təqdim edilir. "Mədəni irsimiz" bölməsində isə Qarabağ zərgərlik ənənələri və xalçaçılıq məktəbi haqqında bəhs olunur. Ötən ilin Azərbaycanda "Turizm ili" elan olunduğunu nəzərə alaraq son iki - "Ənənələri qoruyaq" və "Turizm" bölmələri turistlər üçün maraqlı ola biləcək məqamları əhatə edir. "Ənənələri qoruyaq" bölməsi xalqımızın qonaqpərvərliyinə həsr olunmuşdur. "Turizm" bölməsində isə Azərbaycanın tarixi abidələrinə, təbiətinə, görməli yerlərinə, ötən ildə turizm sektorundakı yeniliklərə, "Eurovision-2011" beynəlxalq mahnı müsabiqəsində ölkəmizin parlaq qələbəsinə, müxtəlif regionların turizm potensialına və tarix ilə müasirliyi özündə birləşdirən Bakının cazibəsinə geniş yer verilmişdir.

Argentinada nəşr olunan bu jurnal dünyanın ispandilli ictimaiyyətini Azərbaycanın tarixi-mədəni irsi və bugünkü reallıqları ilə tanış etmək üçün əhəmiyyətli mənbədir.

Azərbaycan.- 2012.- 10 fevral.- S.2.