Pakistanın Milli Kitabxanasında Heydər Əliyev guşəsi açılmışdır

Fevralın 14-də Pakistanın Milli Kitabxanasında Heydər Əliyev guşəsinin açılış mərasimi və "Pakistan-Azərbaycan münasibətləri" kitabının təqdimatı olmuşdur.

Azərbaycanın Pakistandakı səfirliyindən AzərTAc-a bildirmişlər ki, mərasimdə Pakistanın aparıcı universitetlərinin professor-müəllim heyəti, habelə ölkənin tanınmış ictimai-siyasi xadimləri və kütləvi informasiya vasitələrinin nümayəndələri iştirak etmişlər.

Yaradılmış guşədə ulu öndər Heydər Əliyevin həyat və fəaliyyətindən bəhs edən ədəbiyyat, sənədlərin nüsxələri, fotolar və digər materiallar yerləşdirilmişdir.

Açılış mərasimində çıxış edən Pakistanın Milli Kitabxanasının baş direktoru Məhəmməd Nazir dahi şəxsiyyət Heydər Əliyevin keçdiyi şərəfli ömür yolundan və zəngin fəaliyyətindən danışaraq ulu öndərin müasir müstəqil Azərbaycanın yaranmasında oynadığı müstəsna rolunu vurğulamışdır. Ümummilli lider Heydər Əliyevin Azərbaycan-Pakistan münasibətlərinin banisi olduğunu deyən M.Nazir ulu öndərin 1996-cı ildə Pakistana səfərini xatırlatmış, səfər çərçivəsində ölkələrimiz arasında imzalanmış sənədlərin əlaqələrin hüquqi bazasını təşkil etdiyini bildirmişdir.

Kitabxananın baş direktoru guşədəki materialların geniş auditoriya üçün açıq olduğunu qeyd etmişdir.

Azərbaycan.- 2012.-16 fevral.-S.3.