Azərbaycan mədəniyyəti və turizm imkanları İtaliyada keçirilən görüşlərdə geniş təbliğ edilmişdir

Azərbaycan Respublikasının mədəniyyət və turizm naziri Əbülfəs Qarayev İtaliyaya səfəri çərçivəsində bu ölkənin turizm və idman naziri Pyero Nyudi ilə görüşmüşdür.

Azərbaycanın İtaliyadakı səfirliyindən AzərTAc-a bildirmişlər ki, nazir Ə.Qarayev italiyalı həmkarına Azərbaycan hökumətinin turizmin inkişafına verdiyi prioritet əhəmiyyət, turizm infrastrukturunun inkişafı istiqamətində görülən tədbirlər və İtaliya tərəfi ilə əməkdaşlığa dair məlumat vermişdir. O, iki ölkə arasında turizm sahəsində mövcud olan zəngin əməkdaşlıq imkanlarının reallaşdırılması məqsədi ilə nazir P.Nyudini Azərbaycana səfərə, eləcə də bu ilin aprelində Bakıda keçiriləcək 11-ci Azərbaycan Beynəlxalq turizm və səyahət sərgisinə dəvət etmişdir.

Nazir Ə.Qarayev İtaliyanın turizm operatorlarının və turizm materiallarının naşirlərinin Azərbaycana səfərlərinin təşkil olunması təşəbbüsü ilə çıxış etmişdir. Səfərlərin nəticəsi olaraq, digər məsələlərlə yanaşı, italyan dilində Azərbaycan turizmi ilə bağlı müxtəlif informasiya-təbliğat materiallarının nəşr etdirilməsi də nəzərdə tutulur. Eyni zamanda, Azərbaycanın turizm sahəsində təhsil istiqamətində İtaliya ilə əməkdaşlıqda maraqlı olduğu qeyd edilmişdir.

Azərbaycana səfərlə bağlı Ə.Qarayevin dəvətini məmnunluqla qəbul edən P.Nyudi turizm operatorları və nəşriyyat şirkətlərinin səfərlərinin təşkili istiqamətində səylərini əsirgəməyəcəyini bildirmişdir. O, turizm sahəsində təhsil istiqamətində İtaliyanın zəngin təcrübəsini bölüşməyə hazır olduğunu diqqətə çatdırmışdır.

Həmin gün nazir Ə.Qarayev İtaliyanın mədəniyyət naziri Lorentso Ornaqi ilə görüşmüşdür. Ə.Qarayev iki ölkə arasında tarixən mövcud olan mədəni əlaqələrin inkişafına mühüm əhəmiyyət verildiyini qeyd etmişdir. O, mədəniyyət infrastrukturunun bərpasında İtaliya şirkətlərinin və mütəxəssislərinin iştirakından məmnunluğunu bildirmişdir. Nazir Ə.Qarayev həmkarına cari ildə İtaliyada keçiriləcək Azərbaycanın mədəniyyət günləri və Heydər Əliyev Fondu tərəfindən İtaliyada təşkil ediləcək ölkəmizin müasir incəsənət sərgisi haqqında məlumat vermiş, həmkarını Azərbaycana səfərə dəvət etmişdir. O, yaxın illərdə İtaliya ilə həyata keçirilməsi nəzərdə tutulan incəsənət, musiqi və kinematoqrafiya sahələrində bir sıra əməkdaşlıq layihələri ilə bağlı məlumat vermişdir.

Nazir L.Ornaqi Romada "Azərbaycan: İpək yolu üzərində Odlar Yurdu" sərgisinin açılmasından məmnunluğunu bildirmiş, İtaliyada Azərbaycan mədəniyyətinə, xüsusilə də sivilizasiyalararası dialoq, mədəni-dini müxtəliflik və tolerantlıq kontekstində dərin maraq göstərildiyini vurğulamışdır. O, incəsənət, musiqi, kinematoqrafiya, mədəni abidələrin bərpası və digər sahələrdə əməkdaşlığın vacibliyini bildirərək bu istiqamətlərdə Azərbaycan ilə birgə işləməyə davam edəcəklərini diqqətə çatdırmışdır.

Azərbaycan.- 2012.- 16 fevral.- S.3.