Eurovision-2012 mahnı müsabiqəsində Azərbaycanı Səbinə Babayeva təmsil edəcəkdir

 

Bu il mayda Bakıda keçiriləcək "Eurovision-2012" mahnı müsabiqəsində Azərbaycanı Səbinə Babayeva təmsil edəcəkdir.

AzərTAc xəbər verir ki, Azərbaycan təmsilçisini müəyyənləşdirmək üçün fevralın 12-də Heydər Əliyev Sarayında 5 namizəd arasında milli final yarışması keçirilmişdir. Seçim turunun son konsertində finalçı məlum olmuşdur. "Eurovision-2012"də Azərbaycanı təmsil etmək uğrunda Arzu İsmayılova, Fəqan Səfərov, Elton İbrahimov, Səbinə Babayeva və Orxan Kərimlinin mübarizə apardığı konsert proqramında Səbinə Babayeva qalib gəlmişdir.

İctimai TeleviziyaRadio Yayımları Şirkətinin baş direktoru İsmayıl Ömərov, xalq artistləri Rauf Babayev, Zülfiyyə Xanbabayeva, əməkdar artist Tünzalə Ağayeva, bəstəkar Faiq Sücəddinov, musiqişünas Zümrüd Dadaşzadə, Mədəniyyət və Turizm Nazirliyinin nümayəndəsi Mənzər Nurəliyevanın təmsil olunduqları münsiflər heyətinin qərarı ilə milli seçim turunun qalibi elan olunmuşdur.

Layihə çərçivəsində keçirilən 8 seçim turunda 70 nəfərdən artıq gənc musiqiçinin ifası dinlənilmiş, onlardan 5-i milli müsabiqənin finalına vəsiqə qazanmışdır.

Qeyd edək ki, Bakı şəhərindəki "Baku Crystall Hall"da təşkil ediləcək "Eurovision-2012" mahnı müsabiqəsinin yarımfinalları mayın 22-si və 24-də baş tutacaqdır. Birinci yarımfinalda 18, ikinci yarımfinalda isə 19 ölkə mübarizə aparacaqdır. Ümumilikdə 43 ölkənin iştirak edəcəyi müsabiqənin final mərhələsi mayın 26-da keçiriləcəkdir.

 

 

Azərbaycan.- 2012.-14 fevral.- S. 12.