Qarşıya qoyulan vəzifələr Yasamal rayonunda uğurla yerinə yetirilir

Fevralın 15-də Yasamal Rayon İcra Hakimiyyətində (RİH) 2011-ci ilin sosial-iqtisadi inkişafının yekunlarına və qarşıda duran vəzifələrə dair hesabat yığıncağı keçirilmişdir. Tədbirdə rayonun idarə, müəssisə və təşkilat rəhbərləri, ərazi icra nümayəndələri və ziyalılar iştirak etmişlər.

AzərTAc xəbər verir ki, yığıncaq iştirakçıları əvvəlcə ümummilli lider Heydər Əliyevin rayon icra hakimiyyətinin binasındakı abidəsi önünə tər güllər düzmüş, ulu öndərin xatirəsini ehtiramla anmışlar.

Sonra Yasamal rayonunda və ümumiyyətlə, ölkədə 2011-ci ildə dövlət tərəfindən görülmüş işləri əks etdirən film göstərilmişdir.

Hesabat məruzəsi ilə çıxış edən rayon icra hakimiyyətinin başçısı İbrahim Mehdiyev dövlət başçısının rəhbərliyi ilə respublikada həyata keçirilmiş genişmiqyaslı tədbirlər və əldə olunmuş uğurlar barədə ətraflı məlumat vermişdir.

İ.Mehdiyev vurğulamışdır ki, istər dövlət proqramları çərçivəsində, istərsə də Prezident İlham Əliyevin tapşırıq və tövsiyələrinə uyğun olaraq rayonun daxili imkanları hesabına həyata keçirilmiş tədbirlər nəticəsində Yasamal rayonu əvvəlki illərlə müqayisədə sürətli inkişaf yolu keçmişdir. Ötən il Prezident İlham Əliyev səkkiz dəfə Yasamal rayonunda olmuş, 11 böyük obyektin açılışında iştirak etmişdir. "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" çərçivəsində Yasamal rayonunda üç orta məktəb və səkkiz uşaq bağçası əsaslı təmir edilmişdir. Cari ildə də bir sıra məktəb və uşaq bağçasının bərpa olunması nəzərdə tutulmuşdur. Tikinti işləri təkcə təhsil ocaqlarını deyil, eləcə də səhiyyə, mədəniyyət və idman müəssisələrini də əhatə etmişdir.

Bildirilmişdir ki, hesabat ilində rayonda sənaye məhsulunun ümumi həcmi 231 milyon manat, nəqliyyat sektorunda xidmətlərin həcmi 1 milyard 625 milyon manat olmuşdur. Əsas kapitala isə 802 milyon manat yönəldilmişdir. Pərakəndə əmtəə dövriyyəsi 763 milyon manat, əhaliyə göstərilən pullu xidmətlər isə 521 milyon manat təşkil etmişdir ki, bu da əvvəlki illə müqayisədə müvafiq olaraq 133,5 faiz və 111,9 faiz çoxdur. Orta aylıq əməkhaqqı 12,8 faiz artaraq 456,8 manat olmuşdur. Ötən il rayonda 3444 yeni iş yeri açılmışdır ki, onların 515-i yeni yaradılmış müəssisə və təşkilatlarda, 223-ü mövcud müəssisələrdə, 2696-sı isə fiziki şəxslər tərəfindən yaradılmışdır.

Qeyd olunmuşdur ki, əvvəlki illərdə olduğu kimi, 2011-ci ildə də rayonda genişmiqyaslı abadlıq və yaşıllaşdırma işləri aparılmışdır.

Hesabat məruzəsi ətrafında Bakı Dövlət Universitetinin rektoru akademik Abel Məhərrəmov, Bakı Metropoliteninin rəisi Tağı Əhmədov çıxış edərək ötən ildə respublikamızın uğurlarından, qarşıda duran vəzifələrdən danışmışlar.

Prezident Administrasiyasının məsul işçisi Tağı Tağıyev ötən il ərzində də ümummilli lider Heydər Əliyevin siyasi kursunu layiqincə davam etdirən Prezident İlham Əliyev tərəfindən ölkəmizin beynəlxalq arenada tanınması istiqamətində bir çox genişmiqyaslı işlərin həyata keçirildiyini diqqətə çatdırmışdır.

Sonda iştirakçılar adından Prezident İlham Əliyevə müraciət qəbul olunmuşdur.

Azərbaycan.- 2012.- 16 fevral.-S. 5.