Xocalı soyqırımı Türkiyə mətbuatında

"Zaman" qəzeti

Türkiyənin nüfuzlu "Zaman" qəzetində Milli Məclisin deputatı, "İrəli" İctimai Birliyinin sədri Ceyhun Osmanlının Xocalı soyqırımı ilə bağlı məqaləsi dərc olunmuşdur.

Məqalədə Xocalı soyqırımını və onun ağır nəticələrini xatırladan müəllif qeyd etmişdir ki, 1992-ci il fevralın 25-dən 26-na keçən gecə ermənilər qadın, uşaq və qoca demədən qarşılarına çıxan hər kəsi qətlə yetirmişlər. Həmin gün Xocalıda 106 qadın, 63 uşaq olmaqla, 613 dinc sakin öldürülmüş, 160 nəfər itkin düşmüşdür. Bu dəhşətli faciə nəticəsində 76 nəfər əlil olmuş, 8 ailə tamamilə yox edilmiş, 154 uşaq yetim qalmışdır. Şəhərin 1275 sakini əsirlikdə olarkən erməni əsgərlərinin işgəncələrinə məruz qalmışdır. AzərTAc xəbər verir ki, yazıda həmçinin fevralın 26-da İstanbulun Taksim meydanında "Hamımız xocalılıyıq!" şüarı altında keçiriləcək aksiyalardan da bəhs edilir. Qeyd olunmuşdur ki, bu vəhşiliyi törədənlər bu günə qədər cəzasız qalmışlar. Dünya birliyi 20 ildir ki, Xocalı qırğınını görməzliyə vurur. Biz fevralın 26-da birləşib erməni yalanlarına yox, dünya bundan bir daha dərs alsın, bir daha insanlar acı çəkməsin, uşaqlar ölməsin, bir daha Xocalı soyqırımı yaşanmasın deyirik.

Müəllif erməni terrorçularının təkcə Azərbaycanda deyil, Şərqi Anadoluda, bütün dünyada türklərə qarşı törətdikləri vəhşilikləri xatırladaraq vurğulamışdır ki, Azərbaycan və Türkiyə bu qədər ədalətsiz təzyiq və ittihamlara məruz qalarkən qardaş birliyinə ehtiyacımız daha da qüvvətlənmişdir.

"Milliyyət" qəzeti

Türkiyənin nüfuzlu "Milliyyət" qəzetində İstanbuldakı Taksim meydanında Xocalı soyqırımının 20-ci ildönümünə dair keçiriləcək mitinqə çağırış haqqında "26 fevral yürüşü - hamımız türküz" sərlövhəli məqalə dərc olunmuşdur.

AzərTAc-ın Türkiyədəki xüsusi müxbiri Oqtay Bayramovun müəllifi olduğu məqalədə 20 il əvvəl Azərbaycanın Xocalı şəhərində ermənilərin törətdikləri vəhşiliklərdən bəhs olunur, Taksim yürüşünün bir həmrəylik örnəyi olacağı vurğulanır.

Türkiyə Böyük Millət Məclisinin deputatı Sinan Oğan da AzərTAc-ın Türkiyə bürosuna bildirmişdir ki, möhtəşəm mitinq üçün hazırlıqlar davam edir. Bu yürüş ümumxalq aksiyası olmaqla Türkiyədəki bütün ictimai-siyasi dairələri əhatə edəcəkdir. Belə ki, siyasi partiyaların gənclər təşkilatları, qeyri-hökumət təşkilatları və deputatlar Taksim meydanında keçiriləcək mitinqdə fəal iştirak edəcəklər.

Məqalənin tam mətni ilə http:blog.milliyet.com.tr26-subat-taksim-yuruyusu---hepimiz-turk-uz-Blog?BlogNo=348834&ref=fblike ünvanında tanış olmaq mümkündür.

Azərbaycan.- 2012.- 16 fevral.- S. 6.