«IX-XV əsrlərdə Mərkəzi Asiya və Azərbaycanın xalq tətbiqi sənəti. Saxsı» kitabı nəşr edilmişdir

UNESCO-nun Səmərqənddəki Mərkəzi Asiya Tədqiqatları İnstitutu "IX-XV əsrlərdə Mərkəzi Asiya və Azərbaycanın xalq tətbiqi sənəti. Şaxsı" kitabını rus dilində nəşr etmişdir.

Kitabda IX-XV əsrlərdə Azərbaycan, Qazaxıstan, Qırğızıstan, Türkmənistan, Özbəkistan və Tacikistanda xalq tətbiqi sənəti haqqında ətraflı söhbət açılır.

Nəşrdə yer almış "Azərbaycan" məqaləsinin müəllifi Azərbaycan Milli Elmlər Akademiyası Arxeologiya İnstitutunun əməkdaşı, tarix elmləri doktoru Tarix Dostuyevdir.

Mərkəzi Asiya Tədqiqatları İnstitutunun əslən Azərbaycandan olan direktoru, tarix elmləri doktoru Şahin Mustafayev nəşrə "Ön söz" yazmışdır. "Ön söz"də deyilir ki, IX-XV əsrlərdə Şərqlə Qərb arasında ticarət-iqtisadi əlaqələr inkişaf etmiş, Mərkəzi Asiya ilə Yaxın Şərq arasında mədəni əməkdaşlıq dərinləşmişdir.

Tarix Dostuyev öz məqaləsində yazır ki, orta əsrlərdə Azərbaycanda dekorativ-tətbiqi sənətin əsas istiqamətlərindən biri bədii saxsı məmulatları olmuşdur. Məqalədə deyilir ki, Bakı, Beyləqan, Gəncə, Şəmkir, Dərbənd, Şabran, Qəbələ, Şamaxı, Naxçıvan və digər şəhərlərdə aparılan arxeoloji qazıntılar zamanı o dövrə aid qiymətli saxsı məmulatları əldə edilmişdir.

Məqaləni bu və digər şəhərlərdən tapılan müxtəlif saxsı məmulatlarının 50-dən artıq rəngli və ağ-qara fotoşəkillər müşayiət edir.

Ş.Mustafayev AzərTAc-ın müxbirinə bildirmişdir ki, Mərkəzi Asiya və Azərbaycanın maddi-mədəniyyət abidələri ilə bağlı kitablar bundan sonra da nəşr ediləcəkdir. Məqsədimiz Azərbaycan ilə Özbəkistan arasında elmi sahədə əlaqələri daha da inkişaf etdirməkdir.

Qulu Kəngərli,

AzərTAc-ın xüsusi müxbiri

Azərbaycan.- 2012.- 16 fevral.- S. 8.