«Hamımız Xocalıdanıq» adlı yeni sənədli film çəkilmişdir

"TRT"-nin Bakı Təmsilçiliyi "Hamımız Xocalıdanıq" adlı yeni sənədli film hazırlamışdır.

"TRT"-nin Bakı təmsilçiliyindən AzərTAc-a bildirmişlər ki, XX əsrin ən vəhşi qətliamlarını həyata keçirən ermənilərin əsl simasını göstərən bu sənədli filmdə, Xocalı sakinlərinin yaşadıqları faciədən, onların arzu və istəklərindən bəhs edilir.

"TRT"-nin Bakı təmsilçisi Yüksel Değercan filmin Xocalı qətliamının 20 illiyinə həsr edildiyini bildirmişdir. O, dünyaya demokratiya dərsi verən ölkələrin Xocalı soyqırımına biganə qaldığını, amma bir gün bu səhvi başa düşəcəklərini vurğulamışdır.

"Hamımız Xocalıdanıq" sənədli filmi fevralın 21-də saat 13.05- də Türkiyənin "TRT AVAZ" televiziya kanalı ilə yayımlanacaqdır. Filmin təkrarı isə fevralın 26-da saat 08.40-da ekranlara çıxacaqdır.

Qeyd edək ki, Türkiyənin "TRT 1", "TRT Haber", "TRT Türk" və "TRT AVAZ" televiziya kanallarında Xocalı soyqırımının 20 illiyi ilə bağlı silsilə verilişlər yayımlanacaqdır. Bu televiziya kanalları vasitəsilə erməni vəhşiliyi bir daha Türkiyəyə və dünyaya təqdim ediləcəkdir.

Azərbaycan.- 2012.-21 fevral.- S. 5.