Rəcəb Tayyib Ərdoğan Xocalı faciəsi ilə bağlı TBMM-də çıxış etmişdir

Türkiyənin Baş naziri Rəcəb Tayyib Ərdoğan Böyük Millət Məclisində lideri olduğu Ədalət və İnkişaf Partiyasının qrup toplantısında Xocalı soyqırımından bəhs etmişdir.

Türkiyə hökumətinin başçısı demişdir ki, fevralın 26-da çox anlamlı, kədərli bir ildönümü yaşadıq. Xocalıda iyirmi ilə əvvəl 63 uşaq, 106 qadın, 70-dən çox yaşlı adam olmaqla 613 məsum insan ermənilər tərəfindən amansızlıqla qətlə yetirilmişdir.

R.T.Ərdoğan demişdir ki, qətlə yetirilmiş qardaş və bacılarımı bir daha rəhmətlə yad edirəm, Azərbaycana bir daha Türkiyənin həmrəylik mesajlarını çatdırıram.

Bu faciənin ildönümü İstanbul başda olmaqla bir çox şəhərdə anılmış, mənfur cinayət bütün dəhşəti ilə bir daha lənətlənmişdir. Hər kəs bilsin ki, Xocalı qətliamını unutmayacağıq və unutdurmayacağıq. Orada qətlə yetirilmiş qardaşlarımızın, məsum insanların xatirəsini əziz tutmağa davam edəcəyik. Lakin hər zamankı kimi, nifrəti və kini artıran deyil, sülhü, ədaləti və hüququ müdafiə edən tərəf olacağıq.

Oqtay BAYRAMOV,

AzərTAc-ın xüsusi müxbiri

Azərbaycan.- 2012.- 29 fevral.- S.5.