İdman yarışlarında Azərbaycan bayrağı qaldırılanda bu, həm də «Xocalıya ədalət» hayqırtısı olacaq

Fevralın 26-da paytaxtımızda XX əsrin ən dəhşətli faciələrindən biri sayılan Xocalı soyqırımının 20-ci ildönümü ilə əlaqədar ümumxalq yürüşü keçirildi. Bakının Azadlıq meydanından başlayan, Prezident İlham Əliyevin iştirak etdiyi ümumxalq yürüşündə əsas məqsəd insanlığa qarşı törədilmiş bu vəhşi cinayəti yenidən dünya ictimaiyyətinin diqqətinə çatdırmaq idi. Ümumxalq yürüşündə iştirak edən insanlar Xocalı soyqırımı abidəsi önündə faciənin qurbanlarının xatirəsini hüznlə yad etdi. "Xocalıya ədalət!", "Xocalını unutmayın!", "Xocalı - əsrin soyqırımı!" şüarları müxtəlif dillərdə səsləndirildi.

Respublikamızın tanınmış idmançılarından bəziləri ilə görüşüb söhbət etdik. Onlardan ümumxalq yürüşü barəsində fikirlərini öyrəndik. Çünki hər bir ölkənin bayrağının yüksəklərə qaldırılmasında idmançıların da rolu var. Beynəlxalq idman turnirlərində qazanılan uğurlar ölkənin dünyada tanınmasında əvəzsiz rol oynayır.

Müsahiblərimizdən biri "Neftçi" futbol klubunun və milli komandamızın aparıcı futbolçusu Ruslan Abışovdur. O qeyd etdi ki, XX əsrin dəhşətli faciələrindən biri olan Xocalı soyqırımı bəşər tarixində ən qanlı olaylar sırasında daim xatırlanmaqla yanaşı, ermənilərin əsl mahiyyətinin, iç üzünün ifşa edilməsi baxımından da mühüm əhəmiyyət kəsb edir. Tarixlə daim maraqlanan insan kimi bildirmək istərdim ki, Xocalı faciəsi Srebrenitsa, Ruanda soyqırımları ilə bir cərgədə dayanır. Bu çox ağır bir qətliamdır. Ermənilər Qarabağın digər ərazilərində də bu cür faciələr törətməyə çalışsalar da, qətliamlardan ən dəhşətlisi Xocalıda həyata keçirildi.

Ruslan Abışov qeyd etdi ki, milli komanda xaricdə təlim-məşq toplanışında olduğundan fevralın 26-da Bakıdakı ümumxalq yürüşünü televiziya vasitəsilə canlı izləyib: "Bu yürüş dünyaya açıq bir mesaj idi. Bütün dünya ictimaiyyəti bir daha gördü ki, ermənilərin xalqımıza qarşı yönəlmiş Xocalı soyqırımı öz ağlasığmaz qəddarlığı ilə bəşər tarixində bir vəhşilik aktıdır. Bu soyqırımı eyni zamanda bütün bəşəriyyətə qarşı tarixi bir cinayətdir. İnanın, bu artıq onu deməyə əsas verir ki, dövlət başçısının uğurlu siyasəti nəticəsində yaxın gələcəkdə biz bu yürüşü Qarabağa, Xocalıya doğru edəcəyik. Çünki cənab Prezident İlham Əliyev Azərbaycan ərazilərini işğaldan tam azad etməyə qadir olan ordu yaradıb. Azərbaycan gənci isə bu gün Ali Baş Komandanın əmrini gözləyir.

Sonda bir məqamı da vurğulamaq istərdim ki, "Neftçi"də çıxış edən bir neçə legioner futbolçu bu dəhşətli soyqırımı kadrlarını izlədikdən sonra gözlərindəki yaşı saxlaya bilmədi. Dəfələrlə ermənilərin nə qədər qəddar, işğalçı bir millət olduqlarını vurğuladılar".

Pauerliftinq üzrə dəfələrlə dünya və Avropa çempionu olmuş Vüqar Namazov isə belə bir yürüşün təşkil edilməsinin gələcək nəslin vətənpərvərlik ruhunda böyüməsi üçün çox vacib addım olduğunu qeyd etdi: "Dövlət başçısı İlham Əliyevin rəhbərliyi altında həyata keçirilmiş bu yürüş nəticəsində Xocalı soyqırımı ilə bağlı dünya ictimaiyyəti yetərincə məlumat əldə etdi. Xaricdə yaşayan soydaşlarımız soyqırımının tanınması ilə bağlı təbliğata cəlb olundu. Nəticədə erməni təcavüzü, onun işğalçı siyasəti, Azərbaycan xalqına qarşı törətdiyi vəhşilik, bir sözlə, o günə qədər dünyaya naməlum qalan çox həqiqətlər gün işığına çıxır və çıxmaqda davam edir. Hazırda həqiqətlərin dünyaya çatdırılması, beynəlxalq təşkilatların diqqətinin regiona yönəldilməsi və Ermənistanın bölgədə apardığı təcavüzkar siyasəti ifşa olunmaqdadır. Bir sıra ölkələrdə yaşayan idmançılar mənə zəng edərək, bu soyqırımını pislədilər. Xocalı soyqırımı Avropada, Amerika Birləşmiş Ştatlarında qeyd edilir, ağır cinayət qəti şəkildə pislənilir. Bu, cənab Prezident İlham Əliyevin uzaqgörənliklə istiqamətləndirdiyi təbliğatın, ümumi səylərin nəticəsidir. Bundan sonra hər hansı bir ölkədə keçirilən idman yarışlarında Azərbaycan bayrağı qaldırılarsa, bu, biz idmançıların timsalında "Xocalıya ədalət" hayqırtısı olacaq.

Kikboksinq üzrə dünya və Avropa çempionu Musa Abdullayev: "Ümumxalq yürüşü bir daha onu göstərdi ki, Azərbaycan heç zaman işğal altındakı torpaqlarının daim belə vəziyyətdə qalmasına razı olmayacaq. Bütün dünya, bəşəriyyət Xocalı faciəsini soyqırımı kimi qəbul edəcək. Hər bir türk Xocalı soyqırımının, Qarabağ həqiqətlərinin dünyaya çatdırılması, bu ağır faciəni törədənlərin öz layiqli cəzasını alması üçün çalışmalıdır. Xocalı soyqırımı, Dağlıq Qarabağ problemi bütün türk dünyasının problemidir. Biz idmançılar inanırıq ki, dövlət başçısının layiqli siyasəti nəticəsində ermənilərin iç üzünü bütün dünya görəcək".

M.Abdullayev onu da bildirdi ki, dəfələrlə dünya və qitə miqyaslı turnirlərdə qələbələr qazanmışıq. Dövlət himnimiz səslənmiş, bayrağımız yüksəklərdə dalğalanmışdır. İdmançılar adından bir daha demək istərdim ki, cənab Prezident, Azərbaycan gənci, Azərbaycan əsgəri bu qələbəni Qarabağda da təmin etməyə, Ali Baş Komandanımızın "Zəfərə doğru irəli!" əmrini ləyaqətlə yerinə yetirməyə tam hazırdır.

Beləliklə, idman həm məqsəd, həm də vasitədir. Dövlət idmanın inkişafına qayğı göstərir, idman da öz növbəsində dövlətçiliyə, milli maraqlara, əhalinin, gələcək nəslin sağlamlığına xidmət edir. Hər şey düzgün təşkil olunduqda idman özünü dövlətçiliyin vacib amillərindən biri kimi büruzə verir.

Elçin CƏFƏROV

Azərbaycan.- 2012.- 29 fevral.- S.9.