Qobustan inkişafının yeni mərhələsindədir

Ötən il qobustanlılar üçün yaddaqalan hadisələrin ən başlıcası dövlət başçısının sentyabrın 13-də rayona səfəri olub. Prezident İlham Əliyev Alternativ və Bərpa Olunan Enerji Mənbələri üzrə Dövlət Agentliyinin Qobustan Eksperimental Poliqonu və Tədris Mərkəzinin, Qobustan Tinglik Mərkəzinin və müasir taxılsaxlama anbarı kompleksinin açılışlarında iştirak etmiş, rayon ictimaiyyətinin nümayəndələri ilə görüşündə görülən işlərdən razılığını bildirmiş, qarşıda duran vəzifələrin uğurlu icrası üçün tapşırıq və tövsiyələr vermişdir. Bundan sonra rayon sakinlərinin ruh yüksəkliyi işgüzarlığı daha da artmışdır.

Qobustan üçün ən önəmli məsələlərdən biri rayonun şəhər və kəndlərində içməli su təminatının yaxşılaşdırılmasıdır. Bu məqsədlə Qobustan şəhərini, Təsi, Bədəlli, Sədəfli, Dərəkənd, Ərəbqədim, Cəmcəmli, Göydərə kəndlərini içməli su ilə təmin edəcək su xəttinin çəkilişi davam edir. Rayonun Nabur, Qurbançı, Qaracüzlü, Ərəbşahverdi kəndlərinin içməli su məsələsinin həlli üçün müvafiq orqanlar qarşısında məsələ qaldırılıb. Yaxın vaxtlarda Nabur kəndində sayğacların quraşdırılmasına başlanmalıdır. Qobustan RİH başçısı Adil Məmmədov bununla bağlı bildirdi ki, Qobustan şəhərində su təchizatı və kanalizasiya sisteminin yaradılması məqsədilə layihələndirmə işləri davam edir.

Hazırda rayonun 16 yaşayış məntəqəsi üzrə 4444 abonentə təbii qaz verilir. Ümumilikdə rayon əhalisinin 81,6 faizi təbii qazla təmin olunub. 2010-cu və 2011-ci illərin müqayisəsinə görə, əhali qrupu üzrə əlavə olaraq 310 nəfər təbii qaz alır.

Rayonun Bədəlli, Sədəfli, Poladlı, Təsi, Yekəxana, Cəngi, Şıxzahırlı, Qaracüzlü və Nardaran kəndlərinin qazlaşdırılması üçün müvafiq işlər görülür.

Qobustanda bütün yaşayış məntəqələri elektrik enerjisi ilə təmin olunub, sayğaclaşma tam başa çatdırılıb. Bu sahə ilə əlaqədar mütəxəssislər bir problemin odluğunu bildirdilər. Belə ki, istehlak olunan ümumi enerji ilə istehlakçı sayğacları arasında müəyyən uyğunsuzluq yaranır. Bunun da əsas səbəblərindən biri elektrik təchizatı sisteminin öz istismar müddətini iki dəfədən artıq başa vurmasıdır. Bu məsələ Dövlət Proqramında nəzərdə tutulsa da, hələ ki, ciddi bir iş görülməyib. Xətlərin standartlara uyğun gəlməməsi, transformatorlarla təminat düzgün olmadığından əksər hallarda enerji itkisi də qaçılmaz olur. Rayon icra hakimiyyətində başqa bir məsələ ilə əlaqədar narahatlıqlarını da bildirdilər: regionların sosial-iqtisadi inkişafına dair birinci Dövlət Proqramı xətti ilə Qobustan şəhərində Prezident İlham Əliyev tərəfindən təməli qoyulmuş idman kompleksinin tikintisi davam etdirilir. Lakin kompleksin ilkin layihəsində üzgüçülük hovuzu və mehmanxana tikintisinin nəzərdə tutulmasına baxmayaraq, sonradan həmin obyektlər layihədən çıxarılıb. Dəfələrlə aidiyyəti orqanlara müraciət olunsa da, indiyədək məsələ öz müsbət həllini tapmayıb.

Bəlli olduğu kimi, Qobustan ərazisində maraqlı tarixi abidələr var. Rayonun təbii şəraiti də imkan verir ki, burada turizm inkişaf etdirilsin. Ancaq müvafiq infrastruktur olmadığından bu iş də ləngiyir.

Son vaxtlar diqqətçəkən məsələlərdən biri Qobustanda yol infrastrukturunun yaradılmasına ciddi fikir verilməsidir. Dövlət qayğısı sayəsində 13 min nəfərlik 6 kəndi birləşdirən 23 kilometrlik Qobustan-Xilmilli yolunun 14 kilometr hissəsi əsaslı təmir olunub. Qalan hissədə işlər davam etdirilir.

Ümumilikdə Qobustanda tikinti-quruculuq işləri çox əhatəlidir. Son səkkiz ildə xeyli obyekt tikilib istifadəyə verilib. Rayonda Heydər Əliyev İrsini Araşdırma Mərkəzi yaradılıb. Ulu öndərin adını daşıyan mədəniyyət və istirahət parkı salınıb, həmin parkda Heydər Əliyevin möhtəşəm abidəsi ucaldılıb. Rayon icra hakimiyyəti, YAP rayon təşkilatı, idarə və müəssisələr üçün 10 inzibati bina, sutkalıq istehsal gücü 22 ton olan çörək zavodu, asfalt zavodu, tikiş müəssisəsi, Qobustan şəhərində və Sündü kəndində müasir dəyirmanlar, Cəmcəmli və Bəklə kəndlərində daş karxanaları, əlil və şəhid ailələri üçün 8 və 16 mənzilli yaşayış binası, 3 kənddə poçt məntəqəsi, həmçinin Sənaye və Energetika Nazirliyinin Alternativ və Bərpa Olunan Enerji Mənbələri üzrə Dövlət Agentliyinin Qobustan Eksperimental Poliqonu və Tədris Mərkəzi, AMEA-nın Seysmoloji Stansiyası, tutumu 10 min ton olan taxıl anbarı və bir çox təhsil-mədəniyyət müəssisəsi buna misal ola bilər.

Son səkkiz ildə Qobustan rayonunda 2031-i daimi olmaqla, 9126 yeni iş yeri açılıb. Bu müddət ərzində əhalinin orta aylıq əmək haqqı 6,1 dəfə, pul gəlirləri 3,7 dəfə artıb.

Bir sözlə, Qobustan rayonu da inkişafın yeni mərhələsini yaşayır, insanların rahat yaşaması üçün lazım olan bütün işlər görülür.

T.NƏZƏRLİ

Azərbaycan.- 2012.- 29 fevral.- S.7.