Avropa İttifaqı Dağlıq Qarabağ münaqişəsinin həllinə yardım etməyə hər zaman hazırdır

Dağlıq Qarabağ münaqişəsinin həlli ilə bağlı Azərbaycan və Ermənistan arasında aparılan danışıqların ləng getməsindən narahatıq.

AzərTAc xəbər verir ki, bu sözləri Avropa İttifaqının (Aİ) prezidenti Herman Van Rompey regiona səfəri ərəfəsində "Armenpress" saytına müsahibəsində demişdir.

Aİ rəsmisi bildirmişdir ki, son günlər qoşunların təmas xəttində baş verən insidentlər haqqında məlumatlar bizi həyəcanlandırır. Münaqişənin hərbi gücdən istifadə etməklə həllinə nail olmaq mümkün deyildir. Dağlıq Qarabağ münaqişəsi yalnız sülh yolu ilə həll edilməlidir.

Aİ prezidenti ATƏT-in Minsk qrupuna münaqişənin həllində kömək göstərmək niyyətində olduğunu da nəzərə çatdıraraq razılaşma əldə olunmasının məsuliyyətinin Ermənistan və Azərbaycanın üzərinə düşdüyünü bildirmişdir.

Avropa İttifaqı dəfələrlə ATƏT-in Minsk qrupunun işinə kömək edəcək etimad mühitinin yaradılmasına yardım etməyə hazırdır.

Avropa Parlamentinin bu yaxınlarda qəbul etdiyi və tərəfləri Aİ-nin xüsusi nümayəndəsini Dağlıq Qarabağa buraxmağa çağıran qətnaməsi ilə bağlı sualı cavablandıran H.V.Rompey bildirmişdir ki, bu sənəd heç bir formada Dağlıq Qarabağın tanınması anlamına gəlmir. O qondarma "Dağlıq Qarabağ" respublikasının təmsil etdiyi ittifaq tərəfindən tanınmadığını bir daha diqqətə çatdırmışdır.

Azərbaycan.- 2012.- 1 iyul.- S. 3.