Yevgeniya Haritonova: 25 il bundan əvvəl olduğum Bakıda indi gördüyüm heyrətləndirici inkişafa hər bir Avropa ölkəsi həsəd apara bilər

İyirmi beş il bundan əvvəl olduğum Bakıda indi gördüyüm heyrətləndirici inkişafa hər bir Avropa ölkəsi həsəd apara bilər.

AzərTAc xəbər verir ki, bu sözləri Azərbaycanda səfərdə olan Bolqarıstanın iqtisadiyyat, enerji və turizm nazirinin müavini xanım Yevgeniya Haritonova iyunun 30-da sənaye və energetika nazirinin müavini Natiq Abbasovla görüşündə demişdir.

Qarşılıqlı əməkdaşlıq məsələlərinin müzakirə olunduğu görüşdə N.Abbasov müstəqil Azərbaycan dövlətinin qurucusu Heydər Əliyevin siyasi iradəsi ilə reallığa çevrilən neft strategiyasının respublikamızın hərtərəfli inkişafına şərait yaratmaqla yanaşı, Avropanın enerji xəritəsini də dəyişdiyini, dövlət başçılarımızın məqsədyönlü siyasəti nəticəsində Bolqarıstanın hazırda ən etibarlı tərəfdaş ölkələrdən birinə çevrildiyini qeyd etmişdir.

Görüşdə energetika sahəsində əməkdaşlığın mövcud vəziyyəti və perspektivləri müzakirə olunmuş, Türkiyə və Azərbaycan arasında bu günlərdə imzalanan Transanadolu Qaz Boru Kəməri üzrə hökumətlərarası müqavilənin Bolqarıstanda razılıqla qarşılandığı, Avropanın giriş qapısı olan Bolqarıstanın Azərbaycan təbii qazının əsas alıcılarından biri olacağına inam ifadə edilmişdir.

Bir sıra regional və beynəlxalq layihələr barədə hər iki dövlətin mövqeyinin yaxınlığı razılıqla diqqətə çatdırılmış, sənaye və turizm sektorunda da əməkdaşlığın genişlənməsi üçün potensial imkanların olduğu vurğulanmış, bəzi konkret məsələlər ətrafında fikir mübadiləsi aparılmışdır.

Azərbaycan.- 2012.- 1 iyul.- S. 5.