İdmançılarımızdan yeni qələbələr gözləyirik

Azərbaycanda idman sürətlə və uğurla inkişaf edir. İdmanın inkişafı Azərbaycanda dövlət siyasətidir və Azərbaycan dövləti Azərbaycan idmanının inkişafı üçün konkret addımlar atmışdır.

İlham ƏLİYEV

Azərbaycan müstəqilliyini bərpa edəndən sonra idmançılarımız beşinci dəfədir ki, dünyanın ən ali idman tədbirində - Olimpiya oyunlarında iştirak etməyə vəsiqə qazanmışlar. Hər dəfə də idmançılarımızın yarışlara təntənəli şəkildə yola salınması ənənəyə çevrilmişdir. İlk dəfə onlar ümummilli lider Heydər Əliyevin xeyir-duası ilə 1996-cı ildə Atlantaya, növbəti dəfə 2000-ci ildə Sidneyə Olimpiya oyunlarına yola düşmüşlər. Ulu öndərin tövsiyələri həmişə idmançılarımızın qələbə əzmini yüksəltmiş, onlarda nikbin əhval-ruhiyyə yaratmış və nəticədə Olimpiya oyunlarında böyük qələbələrimizin əsası qoyulmuşdur.

Bu ənənə indi ölkə rəhbəri İlham Əliyev tərəfindən davam etdirilir. İyulun 3-də Heydər Əliyev Mərkəzində Böyük Britaniya və Şimali İrlandiya Birləşmiş Krallığının paytaxtı Londonda keçiriləcək XXX Yay Olimpiya Oyunlarında iştirak edəcək Azərbaycan nümayəndə heyətinin yolasalma mərəsimi də belə keçirildi. Ümumiyyətlə, idmanın kütləviliyinin təmin edilməsi üçün Azərbaycanda geniş tikinti-quruculuq işləri aparılır. Hazırda respublikamızda 34 regional Olimpiya Mərkəzi fəaliyyət göstərir, 8 mərkəzdə tikinti davam etdirilir. Yaxın zamanlarda hər bir rayon mərkəzində müasir Olimpiya İdman Kompleksi olacağı nəzərdə tutulub. 2000-ci ildən başlayaraq son 12 il ərzində, demək olar ki, bölgələrin əksəriyyətində müasir Olimpiya kompleksləri tikilmişdir. Milli Olimpiya komandamızın tərkibində olan idmançıların bəziləri də öz idman fəaliyyətini məhz son illər ərzində tikilmiş Olimpiya komplekslərində başlamışlar.

Londonda keçiriləcək XXX Yay Olimpiya Oyunlarında iştirak edəcək Azərbaycan nümayəndə heyətini yolasalma mərasimində iştirak edən Azərbaycan Prezidenti İlham Əliyev ölkədə idmanın inkişafına göstərilən qayğının nəticələrindən danışarkən demişdir: "Azərbaycan nisbətən gənc müstəqil dövlətdir. Bizim müstəqilliyimizin cəmi 20 yaşı vardır. Ancaq bütün sahələrdə olduğu kimi, idman sahəsində də böyük uğurlar qazana bilmişik. Bu gün dünyada Azərbaycan idman dövləti kimi tanınır. Biz beynəlxalq idman ailəsində layiqli yeri tuta bilmişik. Bu gün Azərbaycan idmançıları hər bir rəqib üçün çox ciddi sınaqdır və idman ölkəsi adını qazanmaq asan məsələ deyildir. Biz bu adı öz əməyimizlə, idmançılarımızın zəhməti, məşqçilərin əməyi ilə qazanmışıq".

Sevindirici haldır ki, ölkəmiz əvvəlki olimpiadalarla müqayisədə daha geniş tərkibdə - 53 idmançı ilə təmsil olunacaqdır. Onların yarışlara hazırlanmasında Azərbaycan Prezidenti İlham Əliyevin 2010-cu il 22 iyun tarixli "XXX Yay Olimpiya Oyunlarına hazırlıq haqqında" sərəncamının böyük rolu olmuşdur. Ölkəmizdə idmanın inkişaf etdirilməsi, Olimpiya hərəkatının genişləndirilməsi, yeni idman və Olimpiya komplekslərinin tikilməsi zərurəti, eləcə də idmançılarımızın London Olimpiadasında, dünya və Avropa çempionatlarında yüksək nəticələr qazanmaları üçün 2012-ci ilin ölkəmizdə "İdman ili" elan edilməsi də əlavə stimul olmuşdur.

Artıq Azərbaycan dünyamiqyaslı idman tədbirlərinə də uğurla ev sahibliyi edir. Belə ki, 2011-ci ildə respublikamızda 36 beynəlxalq yarış təşkil edilmişdir. Cari ilin altı ayı ərzində isə 28 beynəlxalq yarışa ev sahibliyi etmişik. Bu günədək 126 respublika tədbiri keçirilmişdir. 217 beynəlxalq tədbirdə, 79 təlim-məşq toplanışında yığma komandalarımızın iştirakı təmin edilmişdir. Olimpiadaya hazırlıq dövründə keçirilmiş yarışlar ölkəmizin təbliği baxımından da əhəmiyyətli olmuşdur. Buna may ayında ümummilli lider Heydər Əliyevin xatirəsinə həsr olunmuş dörd kontinental, dörd milli və 12 qarışıq kollektivdə, ümumilikdə 180 idmançının iştirak etdiyi 23 yaşadək velosipedçilər arasında beşmərhələli beynəlxalq veloyürüşü misal göstərmək olar. Bir sıra beynəlxalq yarışlar təkcə Bakıda deyil, ölkəmizin müxtəlif bölgələrində də keçirilmişdir. Naxçıvan Muxtar Respublikasında şahmat, yunan-Roma güləşi, üzgüçülük və digər idman növləri üzrə təşkil edilmiş beynəlxalq turnirlər məhz bu qəbildəndir.

Pekin Olimpiadasından ötən dövr ərzində Azərbaycan idmançıları dünya və Avropa çempionatlarından Vətənə uğurlu nəticələrlə dönmüşlər. Bu göstəricilər həm medalların nisbətində, həm də ötən Olimpiya oyunları ilə müqayisədə lisenziyaların artımında da əksini tapmışdır. O cümlədən Olimpiya idman növləri üzrə qazanılmış medalların sayında. Belə ki, Atlanta Olimpiadası ərəfəsində (1993-1996-cı illər) 71 medal, Sidney Olimpiadası ərəfəsində (1997-2000-ci illər) 146 medal, Afina Olimpiadası ərəfəsində (2001-2004-cü illər) 262 medal, Pekin Olimpiadası ərəfəsində (2005-2008-ci ilin yeddi ayı) 467 medal, London Olimpiadası ərəfəsində isə (2009-2012-ci ilin altı ayı) 835 medal qazanılmışdır.

Başqa sözlə, hər Olimpiada ərəfəsində Olimpiya idman növlərində qazanılan medalların sayı əvvəlki Olimpiada ilə müqayisədə təxminən iki dəfə artmışdır. Əgər Pekində keçirilən Olimpiya oyunlarında Azərbaycan 44 lisenziya qazanaraq 11 idman növündə təmsil olunurdusa, Londonda 53 lisenziya ilə 16 idman növündə təmsil olunacaqdır. Ümumiyyətlə, London Olimpiadasında Azərbaycan ilk dəfə olaraq beş yeni - kanoe, akademik qayıqlarda avarçəkmə, velosiped idmanı, idman gimnastikası və qılıncoynatma idman növlərində də təmsil olunacaqdır. Pekində Azərbaycanı bir hakim təmsil edirdisə, Londona beş hakimimiz (güləş, iki gimnastika, boks və ağırlıqqaldırma) iştirak edəcəkdir. Londonda ölkəmizi təmsil edəcək 53 idmançıdan 41-i ilk dəfə Olimpiya oyunlarının iştirakçıları olacaqdır. Komandamız daha geniş beynəlmiləl tərkibə malikdir və əsasən titullu idmançılardan ibarətdir. Onların əksəriyyəti nüfuzlu beynəlxalq idman yarışlarında lisenziya qazanmaqla yanaşı, həmin yarışlarda qalib gəlib dünya və Avropa çempionları adına layiq görülmüşdür. Artıq komandamızın tərkibində müstəqilliyimizin bərpasından sonra dünyaya gəlmiş və ilk dəfə ölkəmizi Olimpiadada təmsil edəcək gənc idmançılar da var. Bu, bir daha sübut edir ki, Azərbaycan idmanı az vaxtda böyük inkişaf yolu keçmiş, perspektivli yeniyetmə və gənc idmançıların aşkar edilməsi üçün ölkəmizdə onlara hər cür əlverişli şərait yaradılmışdır. Məhz idmana dövlət səviyyəsində göstərilən qayğının nəticəsidir ki, indi Olimpiya yığma komandamızın tərkibində ölkəmizi təkcə Bakının deyil, həm də Sumqayıt, Gəncə, Naxçıvan, Mingəçevir, Lənkəran, Astara və digər rayon və şəhərlərimizin idmançıları da təmsil edirlər.

Yeri gəlmişkən, idmançılarımızın yerləşəcəyi Olimpiya kəndində iyulun 25-də Azərbaycan bayrağının qaldırılması mərasimi keçiriləcəkdir. İyulun 28-də keçiriləcək "Azərbaycan günü" adlı tədbirdə isə Beynəlxalq Olimpiya Komitəsinin, bir çox milli olimpiya komitələrinin və beynəlxalq federasiyaların nümayəndələrinin iştirakı gözlənilir.

Azərbaycan Pespublikasının Prezidenti İlham Əliyevin 2012-ci il 3 iyul tarıxli "Böyük Britaniya və Şimali İrlandiya Birləşmiş Krallığının paytaxtı London şəhərində keçirilən XXX Yay Olimpiya Oyunlarında Azərbaycan Respublikasının idmançıları və onların məşqçiləri üçün ən yüksək nəticələrə görə mükafatların müəyyən edilməsi haqqında" sərəncamı ilə qaliblərə həvəsləndirici mükafatlar verilməsi də qərara alınmışdır.

İndi Olimpiya yarışlarında iştirak edəcək idmançılarımızın qarşısında bir vəzifə durur. Yarışlarda iradə, qətiyyət, məharət, ustalıq nümayiş etdirib, Vətənə Olimpiya çempionu, Olimpiya qalibi kimi qayıtmaq. Bu, hər bir azərbaycanlının, hər bir Azərbaycan vətəndaşının arzusudur.

Rəhman SALMANLI

Azərbaycan.- 2012.- 8 iyul.- S. 1.