Cüdoçularımız London Yay Olimpiya Oyunlarına qələbə əzmi ilə yollanırlar

İyulun 9-da əmək və əhalinin sosial müdafiəsi naziri, Azərbaycan Cüdo Federasiyasının prezidenti Füzuli Ələkbərov XXX London Yay Olimpiya Oyunlarında iştirak edəcək cüdoçularla görüşmüşdür.

Nazirliyin mətbuat xidmətindən bildirmişlər ki, görüşdə Füzuli Ələkbərov ölkəmizdə idmanın inkişafı üçün müasir infrastrukturun, o cümlədən regionlarda yeni olimpiya idman komplekslərinin yaradıldığını vurğulamışdır.

Bildirilmişdir ki, yaxın vaxtlarda Bakıda Cüdo İdman Kompleksinin də inşasına başlanılacaqdır. Bu, dövlət başçısının idmana diqqətinin daha bir bariz nümunəsidir.

Qeyd olunmuşdur ki, beynəlxalq turnirlərdə və Olimpiya oyunlarında Azərbaycanı layiqincə təmsil edən cüdoçularımız son beş ildə 1116 qızıl, 829 gümüş, 1056 bürünc medal qazanmışlar. Yalnız 2011-ci il ərzində idmançılarımız 270 qızıl, ümumilikdə isə 705 medala sahib olmuşlar.

Görüşdə çıxış edən cüdoçular Azərbaycanın idman salnaməsini yeni Olimpiya qələbələri ilə daha da zənginləşdirəcəklərini vurğulamışlar.

AzərTAc

Azərbaycan.- 2012.- 10 iyul.- S. 4.