Azərbaycan nümayəndəsi BMT Təhlükəsizlik Şurasında “Postmünaqişə vəziyyətlərində sülh quruculuğu” mövzusunda açıq debatlarda çıxış etmişdir

Azərbaycanın BMT-dəki daimi nümayəndəsi, səfir Aqşin Mehdiyev qurumun Təhlükəsizlik Şurasının "Postmünaqişə vəziyyətlərində sülh quruculuğu" mövzusunda keçirdiyi açıq debatlarda çıxış etmişdir.

A.Mehdiyev bildirmişdir ki, münaqişədən və ərazisinə hərbi təcavüzdən əziyyət çəkən dövlət kimi Azərbaycan danışıqlar vasitəsilə beynəlxalq hüquqa əsaslanan siyasi həll yolunun tapılması üzərində işləyir. Münaqişənin nizama salınması ilə bağlı vəziyyətin hazırda qeyri-müəyyən qalmasına baxmayaraq, Azərbaycan hökuməti artıq bir müddətdir ki, işğaldan azad edilən torpaqlarda sosial-iqtisadi infrastrukturun bərpasını nəzərdə tutan proqram və strategiyaları formalaşdırmağa başlamışdır. Biz bu məqsədlərə səmərəli şəkildə nail olmaq üçün bütün sahələrdə təsisat və resurs qabiliyyətimizi artırırıq. Şübhəsiz, sülh quruculuğu səylərinin bəzi məqamlarında beynəlxalq təcrübədən yararlanmaq ehtiyacı da olacaqdır.

Postmünaqişə vəziyyətlərində sülh quruculuğu məsələsi ilə bağlı Azərbaycanın mövqeyi haqqında danışan səfir A.Mehdiyev belə vəziyyətlərdə aparılan işin davamlı və uğurlu olması üçün bir neçə şərtin vacibliyini də vurğulamışdır. O demişdir ki, vakuum şəraitində sülh quruculuğu baş tuta bilməz, bu proses yalnız beynəlxalq hüququn norma və prinsiplərinə riayət olunan vəziyyətdə mümkün ola bilər. Sülh quruculuğu səyləri beynəlxalq hüququn pozulması nəticəsində yaranan status-kvonun saxlanılmasında alət kimi istifadə oluna bilməz.

Azərbaycan diplomatı onu da qeyd etmişdir ki, sülh quruculuğunun saxlanılması və davamlılığının təmin edilməsi üçün güclü milli sahiblik hissi və təsisatlar vasitəsi ilə milli qabiliyyətin artırılması əsas olmalıdır. Diplomat beynəlxalq ictimaiyyəti dövlətlərin suverenliyinə, müstəqilliyinə və milli inkişaf seçimlərinə hörmətlə yanaşmağa, BMT-ni isə ölkələrin milli strategiyalarının formalaşdırılması və həyata keçirilməsinə yardım üçün beynəlxalq səyləri və resursları səfərbər edərək əlaqələndirici rolunu yerinə yetirməyə çağırmışdır.

Şəfəq AKİFQIZI

Azərbaycan.- 2012.- 15 iyul.- S. 6.