Ömrün 45 ili

Hər gün neçə-neçə qəzet redaktoru "Azərbaycan" nəşriyyatının birinci mərtəbəsində yerləşən "Qəzet-ofset sexinin rəisi" sözləri yazılmış kabinetə girib salam verdikdən sonra "necəsiniz, Elman müəllim?" - deyib öz redaksiyaları üçün ayrılmış və səliqə ilə uzun masanın üstünə düzülmüş qəzet bağlamasını götürüb xudahafizləşirlər. Rəis hamını gülərüzlə qarşılayıb yola saldıqdan sonra növbəti gecə çap olunacaq qəzetlərin siyahısına nəzər salır və işçilərinə - qəzetlərin çapına nəzarət edənlərə, çapçılara öz tapşırıqlarını, tövsiyələrini verir.

Bu cümlələri oxuyan mətbuat, mətbəə işçiləri söhbətin ömrünün 45 ildən çoxunu "Azərbaycan" nəşriyyatında qəzet çapına həsr etmiş, poliqrafiya üzrə respublikanın ilk əməkdar mühəndisi Elman Kərimovdan getdiyini o dəqiqə duyacaqlar.

Elman müəllim sənətinin vurğunu, bilicisidir. Onun adı, necə deyərlər, birincilər sırasında ilk çəkilənlərdəndir. Bu insan nəşriyyatın ən böyük istehsalat sahələrindən birinə rəhbər vəzifəsinə birdən-birə gəlib çıxmamışdır. O, pillə-pillə yüksəlmişdir. Kağız hazırlayıcısı kimi işə qəbul olunan Elman Kərimov sonralar çapçı köməkçisi, çapçı işləmişdir. 20 ildən çoxdur ki, rəis işləyir. Təvazökarlığı, sadəliyi ilə fərqlənən bu insanı iş prosesində, qəzetlərin çapında həmişə fəhlələr arasında, aqreqatların ətrafında görmək mümkündür. Hər bir işçi ilə nümunəvi davranışı diqqət çəkir.

Elman Kərimov öz bilik və bacarığı, təşkilatçılıq qabiliyyəti ilə həm kollektivin, həm də yuxarı əlaqədar təşkilatların rəhbərlərinin rəğbətini, hörmətini qazanmışdır.

Sovetlər dönəmində mərkəzi qəzetlər ittifaqın bütün müttəfiq respublikalarında çap olunurdu. "Pravda" qəzetinin və bir neçə başqa qəzetlərin Azərbaycanda çapı məhz Elman Kərimova həvalə edilmişdir. Qəzetlərin keyfiyyətli çapı uğrunda yarışlar təşkil edilirdi. "Azərbaycan" nəşriyyatında Elman müəllimin çap etdiyi qəzetlər keyfiyyətinə görə bütün respublikalar arasında birinci yeri tuturdu. E.Kərimovun məsuliyyətli və keyfiyyətli işinin nəticəsində Keçici Qırmızı Bayraq beş il dalbadal respublikamızda saxlanılmışdır. Mətbuatla, poliqrafiya məsələləri ilə bağlı respublikamızın paytaxtında keçirilən tədbirlərdə, "Mətbuat günü"nə həsr olunmuş toplantılarda ilk söz, ilk çıxış məhz öz sənətini dərindən bilən, təcrübəli poliqrafçı Elman Kərimova verilirdi. Sonra başqa adlı-sanlı adamlar, mətbuat işçiləri, ictimaiyyət nümayəndələri çıxışlar edərdilər. Bu hörməti o öz qabiliyyəti, mədəniyyəti ilə qazanmışdır.

Bəli, Elman Kərimov hörmətə layiq mütəxəssisdir. O, bilik və bacarığını əsirgəməyən adamdır. Sənətinin incəliklərinə yiyələnmiş bu xeyirxah insan neçə-neçə gəncə sənət bəxş etmiş, onların kamil mütəxəssis kimi yetişmələrində böyük rol oynamışdır. Hazırda onun yetirmələri respublikamızın müxtəlif nəşriyyat və mətbəələrində çalışırlar. Davamçılarından onunla çiyin-çiyinə işləyənlər də az deyildir. Söz düşəndə onun yetirmələri öz hamiləri haqqında ağızdolusu danışırlar.

Hazırda özü də mahir çapçı kimi ad-san qazanmış Akif Rüstəmov deyir:

- "Azərbaycan" nəşriyyatına işə gələndə ilk qayğını Elman müəllimdən görmüşəm. Onun gənclərə münasibəti həmişə müsbət olub. Çap işinin incəliklərini, çap maşınlarının sirlərini bizə dəqiqliyi ilə öyrətmişdir. İndi bizim hər birimiz müstəqil işçilərik, biliyimizi, təcrübəmizi başqalarına öyrədirik. Bunun üçün Elman müəllimə daim minnətdarıq.

E.Kərimovun bütün şagirdləri, bütün yetirmələri bu fikirdədirlər və öz hamilərinə həmişə mehriban münasibət bəsləyirlər. Onun təcrübəsindən, bilik və qayğısından bəhrələnirlər, hazırda harada işləmələrindən asılı olmayaraq, imkan daxilində Elman müəllimə baş çəkir, məsləhətlərini, tövsiyələrini dinləyirlər. Peşəkar poliqrafçı bundan qürur duyur, biliyini həmkarlarından əsirgəmir.

Elman Kərimov həmişə öz üzərində işləməyi, çalışdığı sahəyə yenilik gətirməyi sevən insandır. O, demək olar ki, keçmiş SSRİ-nin bütün respublikalarının aparıcı nəşriyyatlarında dəfələrlə olmuş, həmkarlarının zəngin təcrübələrindən bəhrələnmiş və onu özünün doğma iş yerində - "Azərbaycan" nəşriyyatında tətbiq etmişdir. Elman müəllim qənaətlə işləməyi, doğma müəssisəsinə mənfəət gətirməyi bacaran mütəxəssisdir. O, qəzet çapında kağıza, digər çap materiallarına kifayət qədər qənaət etdiyinə görə dəfələrlə pul mükafatı almış, müxtəlif diplomlarla, "Fəxri fərman"larla təltif olunmuşdur.

Elman Kərimovun bir yüksək keyfiyyətini müqayisəli şəkildə diqqətə çatdırmaq istəyirəm. Hələ tələbəlik illərindən görkəmli jurnalist və pedaqoq Nəsir İmanquliyevin seçimi ilə özünün yaratdığı "Bakı" axşam qəzetinin ilk nömrəsindən işə götürülən və müəlliminin ideyalarını, ənənələrini layiqincə davam etdirərək redaktor vəzifəsinədək yüksələn, sonralar isə AzərTAc-ın baş direktoru işləyən "Şöhrət" ordenli, Prezident təqaüdçüsü Şamil Şahməmmədov kimi Elman Kərimovun da gözündən adi səhv belə yayına bilməz. 20 illik birgə təcrübəmizə əsaslanaraq demək istəyirəm ki, elə bil Şamil müəllimin gözlərində maqnit var idi. Gözlərini mətnin üzərində gəzdirən kimi qələmi istər orfoqrafik, istərsə də ifadə səhvi olsun, onun üstündə dayanardı. Elman Kərimovda da bu qabiliyyət güclüdür. Çap maşınının barabanından (silindirşəkilli hissə) yenicə elevatora düzənlənən ilk qəzetin səhifələrini gözdən keçirəndə hansı şəklin cüzi belə keyfiyyətsiz, hansı mətnin azca solğun çap olunduğunu seçir və qüsurların aradan qaldırılmasına göstərişlər verir, özü həmçinin bu işlə məşğul olmağa başlayır. Beləliklə, nəticədə keyfiyyətli məhsul alınır.

Yeri gəlmişkən bir faktı nəzərə çatdırmaq istəyirəm. "Bakı" qəzetinin 80-90 min nüsxə ilə gündəlik çap olunan vaxtı idi. Qəzetin çap növbətçisi idim. Onun müəyyən faizi çap olunmuşdu. İş guya öz axarı ilə gedirdi. Elə bu vaxt Elman müəllim çap maşınının yanına yaxınlaşıb elevatorla büküm sahəsinə ötürülən qəzetin bir nüsxəsini götürüb səhifələrinə baxdı və tez çapçıya maşını saxlamağı göstəriş verdi. Sən demə, rəsmi dövlət tədbirindən olan şəkil qüsurlu imiş. Üstəlik rəsmi materialın sərlövhəsinin, mətninin bir hissəsinin solğun çap olunduğunu sezmişdi. Qəzetin çapı bir az ləngisə də, Elman müəllim bu qüsurları tam düzəltdirmədən onun buraxılışına icazə vermədi. O bu cür və daha ciddi nöqsanları, ayrı-ayrı qəzetlərdə demək olar ki, hər gün aradan qaldırır, yuxarı təşkilatlarda, redaksiyalarda söz-söhbət yaranmasının qarşısını alırdı. Bu, indi də belədir.

Təbiətən sakit, zahirən səliqəli, daxilən narahat olan, sənətinin zirvəsinə yüksələn Elman Kərimov bu pilləyə qalxmasında öz hamisi və yolgöstərəni Ələsgər Zeynalova təşəkkürünü bildirir. Bu isə onun mədəniyyətinə, özündən böyüklərə, qayğısını hiss etdiyi insanlara sədaqətliliyinə dəlalət edir.

E.Kərimov bütün qəzet redaksiyaları ilə daim ünsiyyət yaradır. Mətbəəyə göndərilən qəzet plyonkalarının, şəkillərin, əsasən də rəsmi tədbirlərdən olan şəkillərin keyfiyyətinə diqqətin artırılmasını tövsiyə edir.

Biz Elman Kərimovun iş prinsipinin bəzi məqamlarına nəzər yetirdik. Belə məqamlar isə lap çoxdur. Onun fəaliyyəti, keçdiyi şərəfli həyat yolu, yaradıcılığı barədə qalın kitablar yazmaq olar.

Respublikanın əməkdar mühəndisi, böyük jurnalistlər və poliqrafçılar ordusunun yaxın dostu, sadə və mehriban insan Elman Kərimov ömrünün 70-ci baharını başa vurur. Ona həyatında möhkəm cansağlığı, yaradıcılığında uğurlar arzulayırıq.

Ənvər MƏŞƏDİYEV

Azərbaycan.- 2012.- 1 iyul.- S. 11.