“Azərmarka” şirkətinin 20 illiyi qeyd olunmuşdur

İyulun 14-də Bakıda Rabitə və İnformasiya Texnologiyaları Nazirliyinin "Azərmarka" şirkətinin 20-ci ildönümü münasibəti ilə mərasim keçirilmişdir.

Şirkətin prezidenti İntiqam Bağırov "Azərmarka"nın fəaliyyəti barədə məlumat verərək bildirmişdir ki, 1992-ci ildən Azərbaycanın poçt markaları tarixində yeni səhifələr açılmışdır. Həmin ildən bu günə kimi "Azərmarka" tərəfindən 883 orijinal süjetli poçt markası hazırlanaraq çap olunmuşdur. Görkəmli şəxsiyyətlərə, arxitekturaya, flora və faunaya, milli mövzuya, nəqliyyata, idmana, kosmosa və digər mövzulara aid 145 milyon 600 mindən artıq ümumi tirajla poçt markası çap olunaraq dövriyyəyə buraxılmışdır.

Poçt markalarının "Azərbaycan Respublikasının Poçt rabitəsi haqqında" Qanununa uyğun olaraq buraxıldığını deyən İ.Bağırov qeyd etmişdir ki, müvafiq sənədlərin əsasında hər il növbəti ildə buraxılacaq poçt markalarının tematik planı işlənib hazırlanır. Buraxılış tematikasında Azərbaycanın görkəmli şəxsiyyətləri xüsusi yer tutur. Bu mövzuda görkəmli siyasi və dövlət xadimi Heydər Əliyevə həsr olunmuş 12 marka, 9 poçt markası bloku buraxılmışdır. Poçt markaları vasitəsilə 20 Yanvar və Xocalı faciələri, həmçinin Qarabağın şəhərləri, onun flora və faunası haqqında dünya ictimaiyyətinə məlumatlar çatdırılır.

"Azərmarka"nın fəaliyyətini yüksək qiymətləndirən rabitə və informasiya texnologiyaları naziri Əli Abbasov bildirmişdir ki, şirkət həyatın bütün sahələrində Azərbaycanın nailiyyətlərini dünya ictimaiyyətinə çatdırır. Poçt markalarından ibarət "İçərişəhər" arxitektura abidələrinə, "Azərbaycan Respublikasının müstəqilliyinin 20 illiyi"nə, gömrük muzeyinin eksponatlarına və bu yaxınlarda Bakıda keçirilmiş "Eurovision-2012" mahnı müsabiqəsinə həsr olunmuş kitablar böyük maraqla qarşılanır.

Şirkətin beynəlxalq sahədə apardığı işlərdən danışan Ə.Abbasov bildirmişdir ki, 20 illik fəaliyyəti dövründə "Azərmarka" 30-dan artıq filateliya sərgisində iştirak etmişdir. Azərbaycan markaları beynəlxalq aləmdə özünün layiqli yerini tutmuşdur. Eyni zamanda, şirkət Ümumdünya Poçt İttifaqının Beynəlxalq Bürosu ilə əməkdaşlıq edir.

Tədbirdə çıxış edən "Azərpoçt" MMC-nin baş direktoru Qəmbər Bəybalayev, Azərbaycan Filatelistlər İttifaqının sədrinin müavini Rövşən Ağayev "Azərmarka" şirkətinə uğurlar arzulamışlar.

Mərasimdə Almaniya, Rusiya və Bolqarıstanın nümayəndələri də iştirak etmişlər.

Tədbirdə "Azərmarka" şirkətinin fərqlənən əməkdaşlarına fəxri fərman və mükafatlar təqdim olunmuşdur.

Sonda "Azərmarka"nın 20 illik yubileyinə həsr edilmiş poçt markalarının dövriyyəyə buraxılması ilə bağlı imzalanma mərasimi keçirilmişdir. Sənədi rabitə və informasiya texnologiyaları naziri Əli Abbasov və "Azərmarka" şirkətinin prezidenti İntiqam Bağırov imzalamışlar.

AzərTAc

Azərbaycan.- 2012.- 15 iyul.- S. 7.