Ağdamın erməni hərbi birləşmələri tərəfindən işğalından 19 il ötür

Azərbaycanın füsunkar guşələrindən olan Ağdamın erməni təcavüzkarları tərəfindən işğalının 19-cu ildönümü ilə əlaqədar rayonun girişindəki Şəhidlər abidə kompleksi qarşısında anma mərasimi keçirilmişdir.

AzərTAc xəbər verir ki, rayon ictimaiyyəti, ağsaqqallar, gənclər, əmək kollektivlərinin nümayəndələri, şəhid ailələrinin üzvləri, hərbçilər abidə kompleksi önünə gül-çiçək dəstələri düzmüş, şəhidlərin ruhuna ehtiramlarını bildirmişlər.

Mərasimdə çıxış edənlər ötən əsrin 90-cı illərinin əvvəllərində baş verən hadisələrdən, Ermənistanın Azərbaycana qarşı apardığı işğalçılıq siyasətindən danışmışlar. Bildirilmişdir ki, 1993-cü il iyulun 23-də Ağdam şəhəri erməni təcavüzkarları tərəfindən işğal olunmuşdur. Erməni silahlı quldur dəstələri rayonun 1154 kvadratkilometrlik ərazisinin 76,4 faizini - bir şəhər, 1 qəsəbə, 82 kəndi işğal edərək vəhşicəsinə talan etmiş, dağıtmış və ya yandırmışlar. Hərbi əməliyyatların aparıldığı dövrdə Ağdamda 6 min soydaşımız şəhid olmuşdur. Onların arasında qocalar, qadınlar və uşaqlar da vardır. Torpaqlarımızın müdafiəsi uğrunda fədakarlıq göstərmiş ağdamlılardan 16 nəfəri Azərbaycanın Milli Qəhrəmanı adına layiq görülmüşdür. Hazırda rayonun 180 minə yaxın əhalisinin 130 mini məcburi köçkün həyatı yaşayır.

Ağdamlı məcburi köçkünlər üçün rayonun işğal olunmamış ərazisində hər cür şəraitə malik 17 qəsəbə inşa edilmişdir. Dövlətimiz tərəfindən hər cür diqqət və qayğı ilə əhatə olunmuş ağdamlılar doğma torpaqlara qayıdacaqları günü səbirsizliklə gözləyirlər. Onlar Prezident İlham Əliyevin münaqişənin həlli ilə bağlı aparılan danışıqlardakı mövqeyini dəstəkləyirlər. Eyni zamanda, Ali Baş Komandanın əmri ilə erməni faşistlərinə qarşı silaha sarılmağa hər an hazırdırlar.

Azərbaycan.- 2012.- 24 iyul.- S. 3.