Yeni Azərbaycan Partiyası Gənclər Birliyinin “Yay məktəbləri”nə start verilmişdir

İyulun 2-də Yeni Azərbaycan Partiyasının (YAP) Gənclər Birliyinin "Yay məktəbləri"nə start verilmişdir. YAP Gənclər Birliyinin sədri Seymur Orucov AzərTAc-a bildirmişdir ki, builki "Yay məktəbləri"ndə partiyanın üzvləri ilə yanaşı, digər fəal gənclər də iştirak edəcəklər.

Bu layihənin 2007-ci ildən həyata keçirildiyini deyən S.Orucovun bu il tədbirin keçirilmə qaydalarının daha da təkmilləşdirildiyini bildirmişdir. Layihədə iştirak edən gənclər həm Bakı şəhərini, həm də bölgələri təmsil edirlər. Hər il olduğu kimi, bu dəfə də "Yay məktəbləri" ölkəmizin gözəl guşələrində təşkil olunur. Gənclərin qalacağı hotellərdə hər cür şərait vardır, onlar bu hotellərin bütün xidmətlərindən istifadə edə biləcəklər. Layihənin məqsədi ondan ibarətdir ki, gənclər həm asudə vaxtlarını yaxşı keçirsinlər, həm bir-biri ilə təmas, münasibət qursunlar. Onlar üçün intellektual və əyləncəli yarışlar da təşkil olunacaqdır. Eyni zamanda burada partiyamızı təmsil edən deputatlar, Milli Məclisin komitə sədrləri, eləcə də hökumət nümayəndələri gənclərin qonağı olacaqlar. Onlar müxtəlif mövzular ətrafında fikirlərini bölüşəcək, gəncləri maraqlarından suallara cavab verəcəklər.

Azərbaycan.- 2012.- 3 iyul.- S. 3.