Londona tarix yazmağa gedirik

XXX London Yay Olimpiya Oyunları

Sabah Böyük Britaniyanın paytaxtı Londonda sayca XXX Yay Olimpiya Oyunlarına start verilir. Olimpiadada mübarizə aparacaq idmançılarımızın bəziləri artıq mötəbər idman turnirinin keçirildiyi şəhərdədirlər.

Heydər Əliyev Beynəlxalq Hava Limanında idmançılarımızın möhtəşəm çoşqu ilə yolasalma mərasimində olimpiadaçılarımızın bəziləri ilə görüşüb söhbət etdik. Onların fikirlərini təqdim edirik:

Elmar QASIMOV:

"Cüdo yığmamızın aktivində qızıl medal mütləq olmalıdır"

"Cüdo üzrə yığma komandamız London Olimpiadasına çox yüksək səviyyədə hazırlıq prosesi keçib. İnanıram ki, Azərbaycan cüdoçuları öz sözlərini deyəcəklər.

Yığmamızın heç bir üzvü Londona yalnız iştirak xatirinə getmir. Bizim hazırlıq səviyyəmiz Olimpiadada ən yüksək nəticələrə ümid etməyə əsas verir. Məşqçilərimizin bütün tapşırıqlarını yerinə yetirmişik. Medal qazanmaq üçün potensialımızı ortaya qoyacağıq. Azərbaycan bayrağını başımız üzərinə qaldırmaq, himnimizi başqa ölkələrdə səsləndirmək hər bir idmançı üçün şərəfdir. Bundan böyük sevinc ola bilməz. Xalqımız bizdən uğurlar gözləyir və deyə bilərəm ki, cüdo yığmamızın aktivində qızıl medal mütləq olmalıdır. İnanıram ki, Londonda uğurla çıxış edərək Vətənə medalla qayıdacağam. Rəqiblərimin hamısını tanıyıram. Onların içərisində zəifi yoxdur. Amma qalib gəlmək üçün gərək mübarizə aparasan. Mən də buna tam hazıram".

Elxan MƏMMƏDOV:

"Ən güclülərin güclüsü olacağıq"

"Məlum olduğu kimi, 2008-ci il Pekin Olimpiadasında cüdo üzrə yığmamız öz sözünü dedi. Düzdür, həmin turnirdə müəyyən səbəblərə görə məğlub olaraq mübarizəni erkən dayandırmaq məcburiyyətində qaldım.

Ancaq bu dəfə London Olimpiadasına çox ciddi şəkildə hazırlaşmışıq. Potensial rəqiblərimizin isə hansı ölkədən olacağının fərqi yoxdur. Çünki bu, dünyanın ən mötəbər idman yarışıdır və ona görə də planetin ən güclü atletləri mübarizə aparacaqlar. Rəqibin kimliyindən asılı olmayaraq, ora medal qazanmaq üçün gedirik. Ən güclülərin güclüsü olacağıq. Hazırlıq prosesini də çox yüksək səviyyədə keçmişik. İnşallah, çəkdiyimiz zəhmətin bəhrəsini görəcəyik. İstəyirik ki, London Olimpiadasında daha bir möhtəşəm uğura imza ataraq xalqımızı sevindirək. İnşallah, bu dəfə də bu nailiyyətə çatacağıq. Bu gün bizləri Londona böyük təmtəraqla yola salan azarkeşləri medallarla sevindirmək istəyirik. Fürsətdən istifadə edib ölkəmizi Olimpiadada təmsil edəcək bütün idmançılarımıza bir daha uğurlar arzulayıram".

Məhəmmədrəsul MƏCİDOV:

"Komandamızın güclü potensialı var"

"London Olimpiadasına çox yaxşı hazırlaşmışıq. Dünyanın bir çox ölkələrində hazırlıq prosesi keçmişik. Təlim-məşq prosesi çərçivəsində bir sıra turnirlərə qatılmışıq və London Olimpiadasında mübarizə aparacaq bəzi idmançılarla qarşılaşmışıq. Onu deyə bilərəm ki, Olimpiadada xüsusilə mənim çəki dərəcəmdə çox güclü idmançılar mübarizə aparacaqlar. Lakin ümid edirəm ki, səylə mübarizə aparıb Vətənə ən azı bürünc medalla qayıdacağam. Bir məqamı da diqqətə çatdırım ki, bu gün Olimpiadaya yığmamız 8 boksçu ilə qatılır. Çox fərəhli haldır ki, bu idmançıların hamısı öz çəki dərəcələrində dünya və qitə çempionatlarının mükafatçılarıdırlar. İnşallah, Azərbaycan boks məktəbi Londonda tarix yazacaq. Bunun üçün komandamızın güclü potensialı var".

Yevgeni LAZUKA:

"Var gücümlə Azərbaycan naminə mübarizə aparacağam"

"Mən 2006-cı ildə yeniyetmələr arasında 50 metr məsafə üzrə yarışlarda dünya çempionu olmuşam və London Olimpiadasına da böyük ümidlərlə yola düşürəm. İnanıram ki, bu mötəbər idman yarışmasında yeni nailiyyətlər qazanacağam. Olimpiadada mən 85 kq çəkidə üzgüçülüyün batterflay üsulu ilə 100 metr məsafəni daha tez qət etmək uğrunda mübarizə aparacağam. 2008-ci ildə Pekində keçirilən Yay Olimpiya oyunlarının da iştirakçısı olmuşam. Mənə London Olimpiadasında iştirak etmək üçün Beynəlxalq Üzgüçülük Federasiyası (FİNA) tərəfindən universal dəvət verilib. Hazırlıq prosesi çox yaxşı keçib. Müəllimlərimdən də razıyam. Əsas məqsəd Londonda uğur qazanmaqdır. Hər bir idmançı kimi mən də Azərbaycana medalla dönmək arzusundayam. Olimpiadada yalnız güclülər mübarizə aparır və onların arasında qalib olmaq hər bir idmançının arzusudur. Var gücümlə Azərbaycan naminə mübarizə aparacağam".

Hayle İBRAHİMOV:

"Maksimum nəticə göstərmək üçün əlimdən gələni edəcəyəm"

"Londonda keçiriləcək Olimpiadaya çox ciddi hazırlaşmışam. Ümid edirəm ki, uğurlu çıxış edəcəyəm. 2010-cu ildə keçirilən Avropa çempionatında bürünc medal qazandım. Keçən il isə qapalı stadionda keçirilən Avropa çempionatında gümüş medala sahib çıxdım. İndi isə mən Azərbaycanın bayrağını Londonda yüksəkliklərə qaldırmaq üçün yola düşürəm. Olimpiada qalibi olmaq istəyirəm. Əsas məqsədim şəxsi rekordumu yeniləməkdir. İnşallah, Vətənə uğurla dönərəm. Bilirəm ki, bütün Azərbaycanın qəlbi Londonda bizimlə bərabər döyünəcək. Çalışacağam ki, mənə olan ümidləri doğruldum. Hər bir idmançıda yarış öncəsi həyəcan olur, amma özünəinam yüksək səviyyədə olduqda qalib gəlmək çətinlik yaratmır. Mən maksimum nəticə göstərmək üçün əlimdən gələni etməyə çalışacağam".

Cüdo üzrə milli komandanın baş məşqçisi Ağayar AXUNDZADƏ:

"Ümidləri doğrultmağa çalışacağıq"

"Çox fərəhli haldır ki, bu gün Azərbaycan Olimpiadada 53 idmançı ilə təmsil olunur. İllər ötdükcə bu göstəricilər daha da artmaqdadır. Ən çox medal gözlənilən sahələrdən biri də cüdo idman növüdür. Bunları nəzərə alaraq, turnirə də çox ciddi hazırlaşmışıq. London Olimpiadasına hazırlığımızı İspaniya, Yunanıstan və digər xarici ölkələrdə keçmişik. Son olaraq İsmayıllıda təlim-məşq toplanışımız oldu. London Olimpiadasına hazırlığımız çox yüksək səviyyədədir. Böyük Britaniya paytaxtına gedən 8 cüdoçunun hər biri fəxri kürsüdə yer almaq iqtidarındadır. Cüdo üzrə yarışlar iyulun 28-də başlanacaq. Yetirmələrimin hər birindən medal gözləyirəm. Çünkü bizim cüdoçuların reytinqləri yüksəkdir. Məsələn, Elnur Məmmədli 81 kq çəki dərəcəsində 3-cü, İlqar Müşkiyev 7-cidir. Buna görə onların hər birinə böyük ümidlər bəsləyirik. İnşallah, bu ümidləri qələbələrlə doğruldarıq".

Rüstəm ORUCOV:

"Vətənə qələbə ilə qayıtmaq ən böyük arzumdur"

"Gənc bir idmançı kimi Londonda keçiriləcək Olimpiadaya yollanıram. Mən 73 kq çəki dərəcəsində mübarizə aparacağam.

Bu çəki dərəcəsində keçən Olimpiadada komanda yoldaşım Elnur Məmmədli mübarizə aparıb və bütün rəqiblərini məğlub edib Azərbaycana qızıl medalla qayıdıb. İndi milli komandamızın fəxri olan Elnur Məmmədli 81 kq çəkidə rəqiblərini sınağa çəkəcək. Buna görə də məşqçilərimiz 73 kq çəkidə kimin mübarizə aparması üçün seçim etməli oldular. Mən bu etimadı doğrultdum və reytinq cədvəlində 56-cı yeri tutduğuma görə London Olimpiadasına lisenziya qazandım. Cüdo yığmamızın bütün üzvləri yarışlara tam hazırdırlar. İnanıram ki, biz Azərbaycanı layiqli təmsil edəcəyik. Vətənə qələbə ilə, qızıl medalla qayıtmaq ən böyük arzumdur".

Boks üzrə milli komandanın baş məşqçisi Nəriman ABDULLAYEV:

"Medal qazanmaq şansımızı çox yüksək görürəm"

"Biz Londona medal dalınca gedirik. İnşallah, qarşımıza qoyulan bu məqsədi həyata keçirəcəyik.

Biz son aylarda çox gərgin təlim-məşq prosesi keçmişik. İdmançılarımız potensial rəqibləri olacaq boksçuları çox yaxından izlədilər. Olimpiya yığmamızda çoxlu dünya, Avropa çempionları və mükafatçıları var. Bu o deməkdir ki, biz onlardan medal gözləyə bilərik. Digər Olimpiya oyunlarına nisbətən bu dəfə komandamızın şansını çox yüksək görürəm. Onu da qeyd edək ki, London Yay Olimpiya Oyunlarında 8 idmançı ilə təmsil olunacağımız özlüyündə bir uğurdur. Dövlət tərəfindən idmançılarımıza diqqət və qayğı gündən-günə artmaqdadır. Bu qayğının qarşılığı mütləq medal olmalıdır. Olimpiadada boks döyüşlərinə 4-5 gün qalıb. Milli komandamızın hər bir üzvü döyüşə hazırdır. Yüksək səviyyədə hazırlıq keçdiyimizdən ümidimiz böyükdür. Proqnoz vermək istəməzdim, ancaq mən komandama güvənirəm. İnanıram ki, boksçularımız göstərdikləri nəticələrlə Azərbaycan xalqını sevindirəcəklər".

Elçin CƏFƏROV,

Rəşad BAXŞƏLİYEV

Azərbaycan.- 2012.- 26 iyul.- S. 4.