Bakı Musiqi Akademiyası kamera orkestrinin konserti təqdim edilmişdir

Heydər Əliyev Fondunun təşkilatçılığı ilə keçirilən Qəbələ IV Beynəlxalq Musiqi Festivalı çərçivəsində iyulun 27-də Üzeyir Hacıbəyli adına Bakı Musiqi Akademiyası (BMA) kamera orkestrinin konserti olmuşdur.

AzərTAc xəbər verir ki, "Qafqaz Resorte" otelinin qarşısında quraşdırılan açıq səma altındakı səhnədə keçirilən konsertdə Azərbaycanın görkəmli bəstəkarlarından Ü.Hacıbəylinin "Arazbari", Q.Qarayevin "Yeddi gözəl" və "İldırımlı yollarla" baletlərindən rəqs, T.Quliyevin "Əziz surət", "Sevgi valsı", F.Əmirovun "Nizami" simfoniyasından II və IV hissələr, "1001 gecə" baletindən Bağdad bazarı, V.Adıgözəlovun "Şuşa", F.Bədəlbəylinin "Dəniz", A.Dadaşovun "Konsertino", eləcə də xarici ölkə bəstəkarlarından A.Piazollanın "Fuqa misteriya", F.Çileanın "Arlezianka" operasından Federikonun naləsi, İ.S.Baxın fortepiano və orkestr üçün konserti səsləndirilmişdir.

Əməkdar incəsənət xadimi Azad Əliyevin və əməkdar müəllim Tofiq Aslanovun dirijorluğu ilə keçirilən konsertdə pianoçular - xalq artistləri Murad Adıgözəlzadə, Murad Hüseynov, əməkdar artist Gülşən Ənnağıyeva, Yeganə Axundova, vokalçılardan İtaliyanın Pezaro Musiqi Akademiyasının tələbəsi Azər Rzazadə (tenor) və beynəlxalq müsabiqələr laureatı Afaq Abbasovanın (soprano), əməkdar artist, xanəndə Aygün Bəylərin böyük məharətlə ifa etdikləri musiqi əsərləri alqışlarla qarşılanmışdır.

AzərTAc

Azərbaycan.- 2012.- 28 iyul.- S. 3.