Beynəlxalq təşkilatlar qaçqınların və məcburi köçkünlərin problemlərinin həlli istiqamətində Azərbaycan hökumətinin gördüyü işləri yüksək qiymətləndirirlər

Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin və Beynəlxalq Humanitar Yardım üzrə Respublika Komissiyasının sədri Əli Həsənov mayın 31-də İran İslam Respublikasının "İmam Xomeyni İmdad Komitəsi" beynəlxalq humanitar təşkilatının Azərbaycandakı nümayəndəliyinin rəhbəri Mahmud Seyyidi ilə görüşmüşdür.

Görüşdə Mahmud Seyyidi Azərbaycanda gedən sürətli iqtisadi inkişafı, demokratik islahatları, geniş əhatəli quruculuq işlərini qeyd etmiş, Dövlət Proqramına uyğun olaraq qaçqın və məcburi köçkünlər üçün yeni qəsəbələrin salınması məqsədi ilə həyata keçirilən tədbirləri yüksək dəyərləndirmiş, həmçinin beynəlxalq humanitar təşkilatların, o cümlədən İran İslam Respublikasının "İmam Xomeyni İmdad Komitəsi" beynəlxalq humanitar təşkilatının Azərbaycandakı nümayəndəliyinin fəaliyyətinə yaradılmış münbit, şəffaf və sıx əməkdaşlığa görə səmimi təşəkkürünü bildirmişdir.

Görüşdə təşkilatın gələcək fəaliyyəti, Ermənistan-Azərbaycan, Dağlıq Qarabağ münaqişəsi nəticəsində ölkəmizdə olan bir milyonadək qaçqının və məcburi köçkünün həyat şəraitinin yaxşılaşdırılması üçün nəzərdə tutulan layihələr barədə ətraflı fikir mübadiləsi aparılmışdır.

Azərbaycan.- 2012.- 1 iyun.- S. 2.