Tərtərdə UNICEF-in dəstəyi ilə reallaşdırılan layihə çərçivəsində keçirilən tədbirdə region gənclərinin problemləri müzakirə edilmişdir

İyunun 7-də Tərtər şəhərində Beynəlxalq Avrasiya Mətbuat Fondunun (BAMF) UNICEF-in dəstəyi ilə reallaşdırdığı "Azərbaycan gənclərinə dəstək proqramı" layihəsi çərçivəsində konfrans keçirilmişdir.

BAMF-ın informasiya departamentindən AzərTAc-a bildirmişlər ki, konfransda Yevlax, Bərdə, Goranboy və Tərtər rayonlarından layihə çərçivəsində yaradılmış təbliğat qruplarının rəhbərləri və üzvləri olan gənclər iştirak etmişlər.

Konfransı giriş sözü ilə BAMF-in sədri, layihənin rəhbəri Umud Rəhimoğlu açaraq reallaşdırılan layihənin əhəmiyyətindən danışmışdır.

UNICEF-in Azərbaycandakı nümayəndəliyinin rəhbəri Mark Hervord təmsil etdiyi beynəlxalq təşkilatın gənclərin və uşaqların inkişafına dəstəyindən danışmışdır. O, bu layihədə daha çox gənclərin özlərini ifadə etmələrinə şərait yaradılmasına üstünlük verildiyini bildirmişdir.

Konfransda müvafiq qurumların təmsilçiləri, UNICEF-in əməkdaşları, layihə heyətinin, təbliğat qrupunun üzvləri müzakirə olunan mövzu ilə bağlı fikirlərini söyləmişlər.

Sonra müvafiq qurumların rəhbərləri gəncləri maraqlandıran sualları cavablandırmışlar. İcrasına 2011-ci ilin oktyabrından başlanan və bu ilin sonunadək davam edəcək layihənin əsas məqsədi gəncləri idarəçiliyə daha yaxından cəlb etmək istiqamətində təlimləndirmək, onları ətraflarında baş verən hadisələrə daha fəal diqqət yetirməyə həvəsləndirmək və müsbət dəyişiklikləri müdafiə etməkdən ibarətdir. Bu məqsədlə erkən evlilik, sağlam həyat tərzi, ətraf mühitin mühafizəsi, gənclərin sosial-iqtisadi inkişaf proseslərində iştirakı və s. məsələlərlə bağlı təlimlər keçiriləcəkdir. Layihə Gənclər və İdman Nazirliyinin yerlərdəki idarələri, rayonların icra strukturları və digər qurumlarla əməkdaşlıq çərçivəsində həyata keçirilir.

Azərbaycan.- 2012.- 8 iyun.- S. 11.