Azərbaycan Avropanın enerji təhlükəsizliyinin təmin olunmasında olduqca böyük rol oynayır

Azərbaycan özünün neft-qaz sənayesini qısa bir zamanda inkişaf etdirmişdir və bu gün Avropanın enerji təhlükəsizliyinin təmin olunmasında olduqca böyük rol oynayır.

Bu sözləri XIX Beynəlxalq neft, qaz, neftayırma və neft kimyası konfransında iştirak edən Avropa İttifaqının Bakı nümayəndəliyinin rəhbəri, səfir Roland Kobia demişdir.

R.Kobia bildirmişdir ki, ənənəvi olaraq hər il keçirilən bu konfransda iştirak edən şirkətlərin sayı artır. Konfrans olduqca yüksək səviyyədə təşkil olunur və qonaqlar çox böyük məmnuniyyətlə Bakıya gələrək bu möhtəşəm tədbirdə iştirak edirlər. Avropa İttifaqı həmişə Azərbaycana maraq göstərmiş və hər dəfə konfransda təmsil olunmuşdur. Yüksək səviyyəli təşkilatçılıq və qonaqların sayının artması Azərbaycanın əldə etdiyi inkişafının nəticəsidir. Azərbaycan regionun aparıcı dövlətidir və çox uğurlu layihələr həyata keçirərək enerji ixrac edən ölkəyə çevrilmişdir. R.Kobia demişdir ki, gələn il Beynəlxalq neft, qaz, neftayırma və neft kimyası sərgisinin və konfransının 20 illik yubileyi olacaqdır. Düşünürəm ki, yubiley münasibəti ilə keçiriləcək tədbirlər möhtəşəm olacaqdır. Avropa İttifaqı mütləq bu yubileydə təmsil olunacaqdır.

Azərbaycan.- 2012.- 10 iyun.- S. 1.