Azərbaycan ilə Niderland arasında əlaqələrin perspektivləri müzakirə edilmişdir

Niderland Krallığında rəsmi səfərdə olan Azərbaycanın xarici işlər naziri Elmar Məmmədyarov iyunun 12-də bu ölkənin Baş naziri Mark Rutte ilə görüşmüşdür. Xarici İşlər Nazirliyinin mətbuat xidmətindən bildirmişlər ki, iki ölkə arasında iqtisadi və siyasi münasibətlərin müzakirə olunduğu görüşdə Azərbaycan-Niderland əlaqələrinin perspektivi ətrafında fikir mübadiləsi aparılmışdır.

Azərbaycan Prezidenti İlham Əliyevin salamlarını Baş nazirə çatdıran Elmar Məmmədyarov Mark Rutteni ölkəmizə səfərə dəvət etmişdir. Dəvətə görə təşəkkürünü bildirən Baş nazir Azərbaycanın "Eurovision-2012" mahnı müsabiqəsinə yüksək səviyyədə ev sahibliyi etdiyi üçün təbriklərini çatdırmışdır. Görüşdə Azərbaycanda və regionda gedən proseslər, həmçinin tərəfləri maraqlandıran digər məsələlər müzakirə olunmuşdur.

Azərbaycan.- 2012.- 13 iyun.- S. 4.