Sərin bulaq, göy çəmən...

Təbiət gəl-gəl deyir

Təbiət bu yerlərə hər neməti bəxş edib. Uca dağlar, zümrüd meşələr, gen tarlalar, sərin bulaqlar, saf təbiətE Ona görə də əzəldən Göygöl-Hacıkənd bölgəsi kütləvi səyahət, xoş istirahət məkanı olubdur. İndi rayonun adı da məşhur, cəlbedici, ürək oxşayandır. Əvvəllər bu səfalı guşənin adı heç özünə yaraşmırdı. Bu yerlər Xanlar kimi tanınırdı. Dəyişilməsi qərara alındı. Bəs bu cənnətməkan diyarın adı nə olsun? Prezident İlham Əliyev bununla bağlı demişdir: "O vaxt bir neçə ad müzakirə edilirdi və mən çox şadam ki, məhz rayon sakinləri tərəfindən Göygöl adı seçilmişdir. Bu, doğrudan da, gözəl addır. Göygöl gözəl göldür. Bu, rayonun və nəinki rayonun, Azərbaycanın ən gözəl təbii sərvətlərindən biridir. Rayonun adı artıq Göygöldür və əminəm ki, bu adla rayon sürətlə inkişaf edəcək".

Mövcud vəziyyətlə tanış olandan sonra dövlət başçısı onu da qeyd etmişdir ki, bütövlükdə Göygöl rayonunun inkişafı son illər uğurla gedir, yaxşı işlər görülür. Müəssisələr tikilir, şəhər abadlaşır. Rayonda quruculuq işləri aparılır. Parklar salınır, insanların yaşaması, istirahəti, işləməsi üçün bütün şərait var.

Həqiqətən də, Göygöl rayonu adına layiq inkişaf edir, hər il yüz milyon manatdan çox məhsul istehsal olunur. Abadlıq və quruculuq işləri getdikcə geniş miqyas alır. Yaşayış məhəllələrini, küçələri, bağları, parkları, tanımaq olmur.

Əvvəllər laqeydlik üzündən Hacıkənd meşələri talan olub gedirdi. İndi vəziyyət nizama düşür. Meşə mühafizəsi və bərpası idarəsində dedilər ki, son bir neçə ay ərzində azı qırx hektar sahədə əkin-səpin işi aparılıb, müxtəlif yerlərdə on minlərlə ağac əkilib. Bu işlərin sistemli surətdə aparılması üçün bir hektar sahədə tinglik təsərrüfatı yaradılıb. İntizam möhkəmlənir, mövcud yaşıllığın mühafizəsi məqsədilə ciddi tədbirlər görülür.

Rayonun nurlu sabahına daha bir qapı açılır. Nazirlər Kabinetinin iclasında səslənmiş bir fakt da Göygöl sakinlərinin sevincinə səbəb oldu: "Son beş ildə aparılmış geoloji axtarış işləri nəticəsində yüksək perspektivliyi ilə fərqlənən Göygöl filiz sahəsində qızıl və gümüşün proqnoz ehtiyatlarının hesablanması başa çatmış və bu sahənin ölkəmizdə ən iri yataqlardan biri olduğu aşkarlanmışdır".

İqtisadiyyat yüksəldikcə gəlir, qazanc artır, rayon öz sərhədinə sığmır. Yeni-yeni küçələr, yaşayış məhəllələri salınır. Təzə sahələrdə kommunal-məişət problemləri qısa müddətdə həll edilir.

İcra hakimiyyətinin başçısı Arif Seyidov deyir ki, burada hər il təqribən 40 milyon manat əsas kapitala investisiya qoyulur, iri həcmli abadlıq-quruculuq işləri aparılır. İctimai binalar, sosial obyektlər, fərdi evlər tikilir. Rayon mərkəzindən Hacıkənd səmtinə qalxan yolun hər iki tərəfində müasir görkəmli obyektlər cərgələnir.

Hazırda olimpiya idman kompleksi, habelə rayon baytarlıq idarəsi, dövlət sosial müdafiə fondu, Milli Təhlükəsizlik Nazirliyinin rayon şöbəsi üçün inzibati binalar tikilir. Mövcud binalar təmir edilir, fasadları milli ornamentlərlə bəzədilir. Küçələr abadlaşdırılır və səkilər düzəldilir.

Rayonda yol təsərrüfatına xüsusi fikir verilir. Mollacəlilli avtomobil yolu əsaslı təmir edilib. Hacıkənd magistral yolunun xeyli hissəsi genişləndirilib, ən əsası isə Bakı-Qazax magistral yolunun Göygölün ərazisindən keçən 36 kilometrlik hissəsinin tikintisi davam edir.

Bir sözlə, turizmin inkişafı üçün hər şərait yaradılır. Keçən il rayon üç min nəfər turisti qəbul edib. Rusiyadan, Almaniyadan, Fransadan, Avstriyadan da xeyli qonaq gəlib. Bu il daha çox adamın gəlməsi gözlənilir. Rayon üzrə dörd turist marşrutu açılıb. Birinci marşrut şəhərin özündə nəzərdə tutulub. Təbiətin qoynunda gəzmək istəyənlər üçün Aşıqlı-Hacıkənd-Göygöl; Topalhəsənli-Zurnabad-Şəhriyar; Köşkü-Üçbulaq və bir də Quşqara-Balçılı istiqamətində səyahətlər müəyyən edilib. Fərəhli haldır ki, hər marşrut üzrə yol-iz sahmana salınıb, istirahət guşələri müəyyən olunub, yolüstü abidələr və ümumən rayonun tarixi haqqında məlumat lövhələri düzəldilib.

Rayonun səfalı guşəsindəki "Yelenendorf", Topalhəsənli kəndindəki "Qala dibi", Toğanadakı "Cənnət məkan" və "Lotos" turist mərkəzləri, Zurnabad səmtində, Gəncəçayın sahilindəki ailəvi istirahət yerləri qonaqların daha çox xoşuna gəlir. Müxtəlif bölgələrdə "Bu vətən sənindir" devizi altında konsert proqramları ilə keçirilən tədbirlər də maraqla qarşılanır.

Göygöl etnik cəhətdən zəngin məkandır. Burada qədim alban-Azərbaycan abidələri və müasir heykəltaraşlıq nümunələri ilə yanaşı, vaxtilə bu yerlərdə yaşamış almanların məişət nümunələri də qayğı və diqqətlə mühafizə olunur.

Bu sahədə müəyyən qayğılar da yox deyildir. Dövlət tərəfindən qorunan tarix və mədəniyyət abidələrinin Nazirlər Kabinetinin 2 avqust 2001-ci il tarixli qərarı ilə təsdiq edilmiş rəsmi siyahısında göstərilir ki, Göygöl rayonunda 31 yerli əhəmiyyətli abidə mövcuddur. Əslində isə bu yerlərdə XII əsrin yadigarları olan Zurnabad qalasından, ikitağlı Ağ körpüdən tutmuş qədimi binalar, kurqanlar, alban məbədləri çoxdur. Nazirlər Kabinetinin qərarına əlavə olunan siyahıda da real vəziyyət dəqiq əks olunmayıb. Görünür, o vaxtlar həmin siyahı tələsik, başdansovdu hazırlanıb. Balçılı kəndindəki Qız qalası, Quşqara körpüsü, Göygöl yolunun üstündəki, habelə Üçbulaq, Zurnabad, Yeni Zod kəndlərindəki alban məbədləri, Tülallar kəndindəki ziyarətgah, onlarca xatirə-memarlıq kompleksi diqqətdən kənarda qalıb. Rayon mədəniyyət və turizm şöbəsində də dedilər ki, doğrudur, siyahıda cəmi 31 abidənin adı çəkilir, lakin son araşdırmalar zamanı 300-dən çox abidənin, xüsusən, tarix-memarlıq dəyəri olan ictimai və yaşayış binalarının mövcudluğu müəyyən edildi. İndi rayonda həmin abidələr haqqında annotasiyalar, yazılar, məlumat lövhələri hazırlanır, pasportlaşma işləri aparılır.

Təbiət həvəskarları ilk növbədə adı dillərdə gəzən Hacıkəndin vəziyyəti ilə maraqlanırlar. Axı, illər boyu baxımsızlıq üzündən burada çox şey dağılıb getmişdi. İndi Hacıkənd diqqət mərkəzindədir. Qəsəbəyə qaz çəkilib. Yollar sahmana salınır. Qəza vəziyyətində olan binalar sistemli surətdə bərpa edilir. Bu günlərdə Gəncə şəhərində keçirilən toplantıda bu barədə ətraflı danışıldı (Hacıkənd qəsəbəsi Kəpəz rayonuna baxır). Bildirildi ki, sistemli surətdə fərdi və ictimai binaların fasadları və dam örtükləri təmir edilir. Müasir üslublu giriş qapısı, milli ornamentli istinad divarları tikilir, icra nümayəndəliyi üçün inzibati bina inşa olunur. Park və bulaq kompleksləri düzəldilir, qonaqlar üçün kottejlər hazırlanır.

Havalar istiləşəndən sonra təbiətin qoynuna kütləvi axın başlanıb. Göygöl-Hacıkənd bölgəsinin səfalı təbiətinə bələd olanlar bu yerlərə böyük həvəslə gəlirlər:

Niyə də gəlməsinlər?! Dağlar diyarının hər qarışı ürəkləri oxşayır. Axı, meşələrin qoynunda dağ çayının səfalı sahili, soyuq bulaq, göy çəmən əsl xoş əhval, sağlamlıq mənbəyidir.

Əhməd İSAYEV

Azərbaycan.- 2012.- 21 iyun.- S. 10.