Bakıda Azərbaycan-Portuqaliya biznes forumu keçirilmişdir

Portuqaliyanın xarici işlər naziri Paulo Portasın Azərbaycana səfəri çərçivəsində iyunun 27-də Bakıda Azərbaycan-Portuqaliya biznes forumu keçirilmişdir.

İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə keçirilən forumda Portuqaliya inşaat, qida sənayesi, İKT, kimya, əczaçılıq, avadanlıq istehsalı və digər sahələrdə fəaliyyət göstərən iş adamlarından ibarət nümayəndə heyəti ilə təmsil olunmuşdur.

Azərbaycan iqtisadi inkişaf nazirinin müavini Niyazi Səfərov Azərbaycanda makroiqtisadi sabitliyin, davamlı və dayanıqlı iqtisadi inkişafın təmin olunduğunu, əlverişli biznes və investisiya mühitinin yaradıldığını vurğulamışdır. Bildirilmişdir ki, hazırda Azərbaycan xarici investisiyalar üçün cəlbedici və əlverişli ölkə olmaqla yanaşı, həm də investisiya ixracatçısıdır. Azərbaycan ilə Portuqaliya arasında əməkdaşlığın inkişaf etdiyini deyən nazir müavini biznes forum və işgüzar görüşlərin iqtisadi əlaqələrin genişlənməsindəki rolundan danışmışdır.

Portuqaliyanın xarici işlər naziri Paulo Portas bildirmişdir ki, Azərbaycana səfərinin məqsədi iki ölkə arasında siyasi və iqtisadi əlaqələrin gücləndirilməsinə təkan vermək, Portuqaliyadan Azərbaycana ixracı dəstəkləmək, eyni zamanda, Portuqaliyaya Azərbaycandan sərmayə cəlb etməkdir. "Təəssüf olsun ki, ölkələr arasında ticarət dövriyyəsi istədiyimiz səviyyədə deyil. Biz qarşılıqlı əməkdaşlığı genişləndirərək şirkətlərin bir-birinin bazarında iştirakını təmin etməyə, bununla da, qarşılıqlı ticarət dövriyyəsini artırmağa çalışacağıq".

AZPROMO-nun vitse-prezidenti Gülşən Rzayeva və Portuqaliyanın Azərbaycandakı səfirliyinin ticarət müşaviri Celesta Mota ölkələrinin iqtisadiyyatına dair təqdimatla çıxış etmişlər.

Tədbirdə Azərbaycan ilə Portuqaliya arasında iqtisadi sahədə mövcud əlaqələr və bu əməkdaşlığın daha da inkişafı üçün imkanlar, sahibkarların rolu müzakirə edilmiş, iş adamları arasında ikitərəfli görüşlər keçirilmişdir.

Biznes forumda AZPROMO ilə Portuqaliyanın Xarici Ticarət və İnvestisiya Agentliyi arasında qarşılıqlı əməkdaşlıq haqqında Anlaşma Memorandumu imzalanmışdır.

Azərbaycan.- 2012.- 28 iyun.- S. 6.