Viza rejiminin sadələşdirilməsi barədə razılıq Azərbaycanın Avropa İttifaqına inteqrasiyasına kömək edəcəkdir

Viza rejiminin sadələşdirilməsi və readmissiya barədə razılıq Azərbaycanın Avropa İttifaqına inteqrasiyasına kömək edəcəkdir. AzərTAc xəbər verir ki, bu sözləri Azərbaycan xarici işlər nazirinin müavini Mahmud Məmmədquliyev demişdir.

M.Məmmədquliyev viza rejiminin sadələşdirilməsi ilə bağlı danışıqların başlanmasını münasibətlərdə vacib addım kimi dəyərləndirərək bildirmişdir: "İstərdik ki, viza rejiminin sadələşdirilməsi Azərbaycanın daha çox vətəndaşını əhatə etsin. Eyni zamanda, nəzərə almaq lazımdır ki, razılaşmaların imzalanması və ratifikasiyası məsələnin yalnız bir tərəfidir. Bu razılaşmaların həyata keçirilməsi üçün Azərbaycan qanunvericiliyinin təkmilləşdirilməsi zəruridir."

Xarici işlər nazirinin müavini demişdir ki, viza rejiminin sadələşdirilməsi ilə əlaqədar sərhəd xidmətində qanunsuz miqrasiya ilə mübarizə və digər məsələlərlə bağlı müəyyən iş aparılmalıdır.

Azərbaycan.- 2012.- 2 mart.- S. 1.