Azərbaycan ilə əlaqələri möhkəmləndirmək ABŞ üçün vacibdir

Birləşmiş Ştatların «World Politics Review» portalı bu barədə yazır

Amerika Birləşmiş Ştatlarının (ABŞ) xarici siyasətlə bağlı "World Politics Review" informasiya portalında Azərbaycan ilə ABŞ arasında diplomatik münasibətlərin 20 illiyi ilə əlaqədar geniş məqalə dərc edilmişdir.

Məqalənin müəllifi ABŞ-ın Qudzon İnstitutunun böyük elmi əməkdaşı və "World Politics Review" portalının baş redaktoru Riçard Vayts qeyd edir ki, zəngin karbohidrogen ehtiyatlarına malik olan Azərbaycan Əfqanıstanda antiterror əməliyyatları aparan NATO qoşunlarına yaxından kömək edərək hava məkanından təmənnasız istifadə etmək üçün icazə vermişdir. Rəsmi Vaşinqton Bakı ilə əlaqələrinə prioritet xarakter verməli və Azərbaycanla əməkdaşlığını gücləndirməlidir. Azərbaycanın sabit və güclü olması ABŞ-ın maraqlarına uyğundur.

11 sentyabr terror hadisəsindən sonra Azərbaycan qeyd-şərtsiz ABŞ-a kömək edəcəyini bəyan etmişdir.

Avropanın enerji təhlükəsizliyindən danışarkən qeyd etmək lazımdır ki, Azərbaycan qitəni yalnız enerji resursları ilə təmin etmir, eyni zamanda, Orta Asiyanın enerji resurslarının Avropaya çatdırılmasında mühüm rola malikdir.

Azərbaycan Birləşmiş Millətlər Təşkilatının Təhlükəsizlik Şurasının qeyri-daimi üzvü seçilmişdir ki, bu da onun artan nüfuzundan xəbər verir.

ABŞ Azərbaycan ilə əlaqələrini möhkəmləndirmək üçün Dağlıq Qarabağ münaqişəsinin həllində rəsmi Bakıya kömək göstərməlidir. Azərbaycanın Dağlıq Qarabağ bölgəsi işğal edildikdən sonra burada separatçı rejim yaradılmışdır.

Azərbaycan enerji ehtiyatlarının ixracından əldə etdiyi gəlir hesabına ölkədə səmərəli iqtisadi islahatlar həyata keçirmiş və olduqca güclü ordu yaratmışdır. Azərbaycan Ordusu istənilən anda itirilmiş torpaqları geri qaytara bilər. Lakin rəsmi şəxslər bildirirlər ki, Azərbaycan münaqişəni qan tökmədən sülh yolu ilə həll etmək istəyir. Bu istiqamətdə həmsədrlərindən biri də ABŞ olan ATƏT-in Minsk qrupu fəaliyyət göstərir. Lakin ötən müddət ərzində bu qurum heç bir irəliləyişə nail ola bilməmişdir. ABŞ administrasiyası Dağlıq Qarabağ münaqişəsinin həll olunması üçün səylərini artırmalıdır. Müharibənin yenidən başlaması ABŞ-ın və Avropanın enerji təhlükəsizliyinə zərbə vuracaqdır. Ağ Ev Dağlıq Qarabağ münaqişəsi üzrə xüsusi nümayəndə təyin etməli və konkret təkliflər irəli sürməlidir.

ABŞ Konqresi Azadlığa dəstək aktına 907-ci düzəlişi ləğv etməlidir. Bu düzəliş ABŞ hökumətinə Azərbaycana birbaşa dövlət yardımı göstərməyə imkan vermir və ABŞ diplomatiyasının fəaliyyətini zəiflədir, regiondakı nüfuzuna zərər vurur.

Azərbaycan ABŞ-ın dostu olduğunu nümayiş etdirmişdir. İndi isə ABŞ-ın dünyanın bu strateji regionunda etibarlı dosta ehtiyacı vardır.

Azərbaycan.- 2012.- 3 mart.- S. 4.